Nur Otan partıasynyń «Amanat» dep aýysýy – uıymda bolatyn aýqymdy ózgeristerdiń basy ǵana. Qazaqstandyq sarapshylar osyndaı pikirde.
Olardyń aıtýynsha, partıadaǵy ózgeristerdi onyń basshylyǵynyń qoǵam pikirine qulaq asqandyǵyn jáne halyqpen dıalog ornatý jumysyn odan ári jandandyrýǵa nıetti ekenin kórsetedi, dep habarlaıdy Almaty-akshamy.kz Qazaqtv.com saıtyna silteme jasap.
«Partıanyń myqty tusy – onyń ınstıtýsıonaldyq bazasy, ári elektoraty óte keń. Álsiz tusy – Nur Otan partıasynyń shekten tys búrokratızasıalanýy jáne halyqtyń múddesin bildirmeýi. Muny qańtar oqıǵasy anyq kórsetti. Endi partıa men saıası partıalar kóbeıedi dep oılaımyz. Nur Otan partıa múshelerin saqtap qalýy jáne belsendi jumys isteýi úshin óz kózqarasyn ózgertýi qajet», - deıdi Qazaqstan qoǵamdyq damý ınstıtýtynyń sarapshysy Juldyzaı Ysqaqova.
«Amanat» partıasy óz ustanymdary men jumys tásilderin jańǵyrta bastaǵany quptarlyq is. Eýrazıalyq ıntegrasıa ınstıtýtynyń dırektory Orazǵalı Selteevtiń aıtýynsha, partıa jumysy komýnıkasıany qurýdan bastap, tıimdi nátıjelerge baǵyttalýy kerek.
«Qazir mańyzdysy - partıa men elektorat, ortalyq apparat pen fılıaldar, depýtattar men halyq arasyndaǵy baılanysty arttyrý. Aıtqym kelgeni, jumys saıası uıymnyń ataýy men logotıpin ózgertýmen shektelmeýi tıis», - deıdi Eýrazıalyq ıntegrasıa ınstıtýtynyń dırektory Orazǵalı Selteev.