Turǵyndar basqarý organdaryn qurmasa, bul úıler basqarýsyz qalady.
Almatydaǵy turǵyn úılerdiń 50 paıyzy páter ıeleri kooperatıvinen múlik ıeleri birlestigine jáne jaı seriktestikke aýysty. Qalǵan jartysy shilde aıyna deıin páter ıeleri kooperatıvinen shyǵýy tıis. Bul týraly qalalyq turǵyn úı saıasaty basqarmasy málimdedi, dep habarlaıdy Almaty-akshamy.kz Almaty.tv silteme jasap.
Alaıda basqarýdyń bul túrinen bas tartý kezeńi ońaıǵa soqpaıdy. Sebebi halyq arasynda múlik ıeleri birlestigi men jaı seriktestiktiń arajigin ajyrata almaıtyndar jeterlik deıdi basqarma ókilderi. Osy oraıda jaýapty mamandar halyqty tolǵandyrǵan suraqtarǵa jaýap berý úshin búgin Ashyq esik kúnin uıymdastyrdy. Olar dittegen maqsatqa jetý úshin jazǵa deıin belsendi túrde túsindirme jumystaryn júrgizemiz dep otyr.
«Halyqqa kómek, túsindirme jumystaryn júrgizý úshin osy shara ótkizilip otyr. Shildeden bastap PIK-ter zańǵa sáıkes joıylýy kerek. Sonyń bárin jetkizip jatyrmyz. Erteń PIK joıylsa, turǵyndar basqarý organdaryn qurmasa, bul úıler basqarýsyz qalady», - dedi turǵyn úı saıasaty basqarmasynyń bólim basshysy Jandos Qaıyrhanov.
Al turǵyndar zańnamada kórsetilgen erejeler qarapaıym halyqqa túsiniksiz deıdi. Onyń ústine úırenshikti basqarý túrinen aýysý talabyn kópshiliktiń qabyldaýy da qıyn. Al túsindirme jumystary túıtkildi máselelerdi sheshýge kómektesetinin aıtady.
«Biz ózimiz múlik ıeleri birlestigin qurdyq. Men basqaramyn. Biraq qujattardyń keıbirin áli retteı almaı jatyrmyz. Suraqtarǵa jaýap alyp, kórshilerime de barlyǵyn túsýindirý úshin keldim», - dedi qala turǵyny Anar Beısembaeva.