Almatyda Abaı dańǵylynyń ýchaskelerindegi oıyqtar jaqyn kúnderi merdigerdiń esebinen joıylady - QMB
Qalalyq mobıldilik basqarmasy Almatydaǵy Abaı dańǵylynyń ýchaskelerinde oıyqtardyń paıda bolý sebepteri jáne olardyń qashan joıylatyny týraly aıtty, dep habarlaıdy aqshamnews.kz
Bul týraly qalalyq mobıldilik basqarmasynyń basshysy Saǵyndyq Telibaev Almaty máslıhatynyń kezekti sesıasy barysynda depýtattardyń suraqtaryna jaýap bergende aıtty.
«Ótken jyly Abaı dańǵylynyń Dostyq dańǵylynan Tilendıev kóshesine deıingi ýchaskesinde asfáltbeton jabynynyń eki qabaty tóselip, ortasha jóndeý jumystary júrgizilgeni belgili. Alaıda, búginde qoǵamdyq kólikterge arnalǵan bólek jolaqta árqaısysynyń uzyndyǵy 20 metr bolatyn 6 ýchaskede oıyqtar anyqtaldy. Atalǵan ýchaskelerde asfáltbeton qabattarynan jol jabynynyń negizine deıin kerndi irikteýmen zerthanalyq zertteýler júrgizildi», - dedi Saǵyndyq Telibaev.
Basqarma basshysynyń aıtýynsha, irikteý nátıjeleri boıynsha kernderdiń ortasynda oıyq bar ekeni anyqtalǵan. Bul beriktigi tómen eski asfáltbetondy kórsetedi, 15-ten 30 sm-ge deıingi tereńdiktegi eski asfáltbeton óte juqa.
Ótken kezeńderde jıi jóndelgendikten juqaryp qalǵan.
«Aqaýlardy joıý maqsatynda 29 tamyz kúni keshke merdiger uıym kepildik mindettemeleri aıasynda óz qarajaty esebinen joltabanmen ýchaskelerdi frezerleýdi bastaıdy, sodan keıin úsh qabatty asfáltbeton tóseledi»,- dedi QMB-nyń basshysy.
Ol jalpy barlyq jóndeletin joldarda sapany baqylaý úshin tehnıkalyq jáne avtorlyq qadaǵalaý qyzmetteri tartylatynyn aıtty. Sonymen qatar, jol-qurylys jumystarynyń sapasyn baqylaýdy avtomobıl joldary Komıtetiniń jol aktıvteri sapasynyń Ulttyq ortalyǵy júzege asyrady.