Árbir azamat sapaly qyzmet alýǵa quqyly, bul jaǵdaıda memlekettik qyzmetter týraly aıtyp otyrmyz. Memlekettik qyzmetter kórsetiletin tizilimde kózdelgen qyzmetterdiń sany búginde shamamen 1327-ni quraıdy jáne ol turaqty ózgerý ústinde.
Árbir qyzmet úshin kórsetiletin qyzmettiń tártibi, merzimderi, qyzmetti berýshi týraly málimetter, usynylatyn qujattar tizimi jáne bas tartý negizderi zańnamalyq túrde rettelgen arnaıy erejelermen belgilengen. Barlyq qyzmet kórsetýshiler osy erejelerdi qatań saqtaýy tıis.
Alaıda, bul normalar árdaıym saqtala bermeıdi. Qyzmet kórsetý merzimderiniń buzylýy, artyq qujattar talap etilýi, qyzmet kórsetý prosesiniń buzylýy, negizsiz bas tartýlar sıaqty jaǵdaılar jıi oryn alady. Nátıjesinde halyq moraldyq ǵana emes, materıaldyq shyǵyndarǵa da ushyraıdy: mámileler buzylyp, ýaqyt joǵalyp, qarjy shyǵyndary paıda bolady.
Tájirıbe kórsetkendeı, azamattardyń ózderi bul buzýshylyqtar týraly kóbinese bilmeıdi nemese baıqamaıdy.
Memlekettik qyzmet isteri agenttigi osy baǵyttaǵy jumys jaı-kúıin qashyqtan monıtorıń júıesi arqyly baqylap otyrady. Bul júıe naqty ýaqyt rejıminde qyzmet kórsetý prosesin, onyń merzimderin jáne buzýshylyqtardy qadaǵalaýǵa, sol arqyly aldyn alý sharalaryn der kezinde qabyldaýǵa múmkindik beredi.
Sonymen qatar, zańnamada kórsetiletin qyzmetti berýshilerdiń aqparattyq resýrstaryn jańartyp otyrý mindeti naqty kórsetilgen. Degenmen, barlyq kórsetiletin qyzmetti berýshiler ınternet-resýrstardaǵy óz paraqshalaryn sapaly toltyrýdy qadaǵalamaıdy. Mysaly, keıbir resýrstarda kúshi joıylǵan quqyqtyq aktilerge siltemeler jasalýy múmkin.
Aqparattyń qoljetimdiligi men ózektiligi mańyzdy bolǵandyqtan, biz memlekettik organnyń ataýy, baılanys derekteri, qurylymdyq málimetter jáne qyzmetteri týraly aqparatty únemi jańartyp otyrýdy talap etemiz. Árbir azamattyń qajetti aqparatty tolyq jáne naqty alý quqyǵy bar.
Mysaly, Almaty qalasynyń 170 mektebiniń saıttaryna qashyqtyqtan baqylaý júrgizý barysynda, kúshi joıylǵan normatıvtik-quqyqtyq aktiler anyqtaldy, nátıjesinde kináli tulǵalar jaýapkershilikke tartyldy.
Qoǵam ókilderiniń qatysýymen 8 memlekettik organǵa qoǵamdyq monıtorıń júrgizilip, nátıjesinde 271 buzýshylyq anyqtaldy. Halyqtyń áleýmettik osal toptary jáne barlyq azamattar úshin memlekettik qyzmetterdiń qoljetimdiligi tekserildi. Bul tekseris ǵımaratqa kirýden bastap, qyzmet kórsetý prosesiniń sapasyna deıin qamtyldy. Atalǵan buzýshylyqtar HQKO fılıaldarynda jáne keıbir memlekettik organdarda oryn aldy.
Departament mundaı baqylaý sharalaryn turaqty túrde júrgizedi. Maqsaty – barlyq azamattarǵa memlekettik qyzmetterdi qarapaıym, jedel jáne qoljetimdi etý.