Sabyrkúl Asanova atyndaǵy shyǵarmashylyq stýdıa ashyldy
Ulttyq brend – «Symbat» sán akademıasynyń negizin qalaýshy, profesor, QR pedagogıka ǵylymy akademıasynyń akademıgi, Qazaqstannyń eńbek sińirgen qaıratkeri Sabyrkúl Jaılaýbekqyzy 80 jasqa toldy. Ómirin qazaqtyń ulttyq ónerine arnaǵan sánger –Qazaqstannyń sán ındýstrıasynyń kýágeri.
Mereıtoıǵa oraı, 28 aqpan-1 naýryz aralyǵynda Sabyrkúl Asanovanyń ǵylymı-zertteý, shyǵarmashylyq jáne óndiristik qyzmet jolyna arnalǵan birqatar is-shara ótkizý josparlanǵan. Solardyń biri – «Symbat» akademıasyndaǵy Sabyrkúl Asanova atyndaǵy shyǵarmashylyq stýdıanyń ashylýy. Akademıada bilim alyp júrgen stýdentter shyǵarmashylyqpen aınalysatyn stýdıa murajaı retinde ashyldy. Stýdıaǵa sángerdiń qolynan shyqqan ulttyq kıimder men basqa da sheberlerdiń týyndylary qoıylǵan. Sol jerdegi ınteraktıvti taqta arqyly Sabyrkúl Asanovanyń dızaınerlik jumystarymen tanysa alady.
İs-sharaǵa óner qaıratkerleri, elimizdiń JOO-nyń basshylary, sángerdiń Qyrǵyzstan, Túrkıa men Mońǵolıadan kelgen zamandastary qatysyp, shyǵarmashylyq qyzmeti týraly esteliktermen bólisti.
«TÚRKSOI» Halyqaralyq Túrki mádenıeti uıymynyń bas hatshysynyń orynbasary Iýsýf Saııt arnaıy kelip, túrki mádenıetine sińirgen eńbegi úshin mereıtoı ıesine «Túrksoı» tósbelgisin tabystady.
«Mýzeıge Sabyrkúl Jaılaýbekqyzynyń 55 jyl eńbek jolynda jasaǵan jumystary men «Symbat» akademıasynyń halyqaralyq deńgeıde kórsetken qolónerleri qoıyldy. «Zamandastar ocherki» atty kitabynyń tusaýy kesildi. Qolónerge, onyń ishinde, quraq ónerine arnaǵan jobalary qoıyldy», - deıdi «Symbat» dızaın jáne tehnologıa ınstıtýtynyń prorektory Botagóz Turǵanbekqyzy.
Taqyrypqa oraı
Janna MUSTAFINA, tehnıka ǵylymynyń kandıdaty: «Jeń qondyra alasyń ba?»
Sabyrkúl Asanovanyń meni jumysqa qabyldarda qoıǵan birinshi suraǵy osy boldy. Maǵan bul suraqty qoıǵanda, qatty tań qalyp, rıza bolǵanym esimnen ketpeıdi. Óıtkeni, naǵyz kásibı suraq boldy. Úlken akademıanyń basshysynan mundaı suraq kútpedim. Ol kezde usaq suraq bolyp kórindi. Biraq kez kelgen tigin buıymynyń sátti shyǵýy jeńin qondyrýyna baılanysty bolady. Sondyqtan tigin salasynyń mamandary buǵan úlken mán beredi.
Ujymdaǵy qyzmetkerlerdiń bárimen ózi sóılesip, jumysqa qabyldaıdy. Negizgi qaǵıdasy – nátıje. Áriptesteri men shákirtterinen eń birinshi nátıje kútedi. Ózine úlken talap qoıady, ózgege de talapshyl adam. Sabyrkúl Asanovanyń jetekshiligimen magıstratýra bitirip, kandıdattyq dısertasıa qorǵadyq. Birneshe jyl buryn ol kisiniń bastamasymen akademıada dısertasıalyq keńes ashylǵan bolatyn. Ózi tigin tehnologıasy boıynsha alǵashqy dısertasıa qorǵap, doktorlyq ataǵyn aldy. Birneshe kandıdat pen doktorlar tárbıelep shyǵardy.
