Astanadaǵy Iýnýs Emre atyndaǵy túrik mádenıet ortalyǵynyń uıymdastyrýymen Almaty qalasyndaǵy «Qazaq konsert» zalynda «Notalar saıahaty» atty túrik ónerpazdardyń konserti ótti.
Konsertte «Dombyra» atty ánimen barsha Túrki álemine tanymal ánshi, kompozıtor Arslanbek Sultanbekov pen orkestri óner kórsetti. Sharaǵa Túrkıa Respýblıkasynyń Almaty qalasyndaǵy Bas konsýly Evren Múderrısoglý qatysyp, ónerpazdardy marapattady, dep habarlaıdy almaty-akshamy.kz.
Eki baýyrlas el Túrkıa men Qazaqstannyń arasyndaǵy mádenı sharalar basqa salalarmen qatar ýaqyt ótken saıyn artyp keledi. Án men kúıdiń halyqtardyń bir –birin tanýdaǵy orny erekshe. Túrki jurtynyń jarasymdylyǵy men syılastyǵy Almatydaǵy sahna tórinde de erekshe kórinis tapty. Konsertte túrik, qazaq, altaı, noǵaı tilderinde án men kúıler oryndaldy.
Orkestr quramyndaǵy túrik ónerpazdar basqa aspaptarmen qatar túrki órkenıetiniń aspaby dombyra jáne qobyzben de oryndalǵan shyǵarmalardy súıemeldedi. Túrkıadan kelgen ánshi Akdenız Erbash Qadyr Myrzaáliniń sózine jazylǵan Áshirhan Telǵozıevtiń «Qazaq osy» ánin naqyshyna keltire oryndap, tyńdarmannyń zor yqylasyna bólendi.
Iýnýs Emre atyndaǵy túrik mádenıet ortalyǵynyń dırektorynyń mindetin atqarýshy Ph.Dr. Almagúl Isınanyń aıtýynsha «Notalardyń saıahaty» atty konsert Iýnýs Emre ınstıtýtynyń uıymdastyrýymen ótken aılarda Majarstannyń astanasy Býdapesht men Soltústik Kıpr Túrik respýblıkasynda ótken bolatyn. Al Almatydaǵy konsert bolsa, Arslanbek Sultanbekov pen orkestrdiń úshinshi konserti bolyp tabylady.
Keshtiń qonaǵy retinde Qazaqstandyq etno-folk «Arqaıym» tobynyń solıseri Abzal Aryqbaev pen Anar Qasymova qatysyp, ulttyq dástúrdegi jáne zamanaýı shyǵarmalar oryndady. Talantty dombyrashylar Tolǵanaı Hasen men Aıdana Qabylova qazaq kúılerin tyńdaýshyǵa tartý etti.
Konserttiń sońynda orkestrdiń súıemeldeýimen túrik jáne qazaq ónerpazdar oryndaǵan Arslanbek Sultanbekovtyń «Dombyra» áni kórermenderdiń erekshe qoshemetine ıe boldy.