Almatylyq jas dızaınerler Qyrǵyzstanda ótetin sán aptalyǵyna qatysady
Elimizdegi sán ındýstrıasyn álemdik deńgeıge shyǵarǵan Kazakhstan Fashion Week jobasy ýaqyt ótken saıyn qarqyndy damyp keledi.
Jaqynda Almatyda shyǵarmashyl jastardyń basyn qosyp, olardyń feshn ındýstrıa álemindegi qoltańbalaryn pash etýge baǵyttalǵan Kazakhstan Fashion Week (KFW) ulttyq sán aptalyǵynyń kezekti 34-maýsymy ótti. Mercedes-Benz dıllerlik ortalyǵynda uıymdastyrylǵan sángerler saltanatyna otandyq jáne sheteldik dızaınerler ózderiniń 30-ǵa jýyq brendin usyndy. Al keremet keshti sán áleminiń serkelerimen qatar, sheteldik qonaqtar, kásipkerler, shoý-bıznes ókilderi, blogerler men talǵampaz kórermender tamashalady. 
Aptalyqtyń shymyldyǵy esimi Qazaqstanda ǵana emes, shetelderge de keńinen tanymal, tabysty dızaıner Aıda Káýmenovanyń toptamasymen ashyldy. Birneshe jyldan beri óziniń jeke markasynda (Aida KaumeNOVA) brendti kıimder shyǵaratyn otandyq sángerdiń bul jolǵy koleksıasyndaǵy túsi qanyq reńkter men tabıǵı matanyń minsiz úılesimi kópshilikke erekshe shabyt syılady. Onyń ár toptamasynan ultynyń salt-dástúrin qurmetteıtin jáne óziniń erekshe stılin saqtaı otyryp, zamanaýı tabysty áıeldiń daralyǵyn kórsetetin beınelerdi kórdik. 
Jańa dızaınerlik toptamalardyń feshn-kórsetilimin odan keıin Issenkel jáne Vella Ahtımer, Alekseı Chjen, Adılá Botabaeva, Leonıd Jerebsov syndy brend ıeleri men jas dızaınerlerdiń kıim úlgileri jalǵastyrdy. Jylyna eki márte, ıaǵnı kóktem-jaz, kúz-qys koleksıalaryn usynatyn joba bıyl da jastar shyǵarmashylyǵyna basymdyq beripti. 
Aptalyqtyń alǵashqy kúninen erekshe kózge túsip, kórermen kózaıymyna aınalǵan jas dızaınerlerdiń qatarynda almatylyq NÚSİP Toǵjan Muratqyzy da bar. 
Toǵjan NÚSİP – New Generation Open Way 2023 baıqaýynda 300-ge jýyq kıim eskızderi men ótinishterin usynǵan úmitkerdiń arasynan 22 fınalıstiń tizimine engen jeńimpazdyń biri. Qazirgi tańda T.Júrgenev atyndaǵy Ulttyq akademıanyń «Teatr jáne kıno sahnalyq kostúmi» mamandyǵynyń bitirýshi stýdenti, Sándik qoldanbaly óner salasynyń tekstıl sýretshisi. Ótken jyly «Matai» brendimen kópshilikke tanylǵan Toǵjan bıyl sánsúıer qaýymnyń nazaryna etnıkalyq stıldegi KIVAZ brendimen BAYAN toptamasyn usynyp otyr. 
Ulttyq naqyshtyń sán áleminde birneshe baǵyttary bar ekenine erekshe kóńil bólgen jas sángerdiń BAYAN koleksıasy kóshpendilerdiń dástúrli mádenıetin beıneleıdi. Kıim úlgilerinde ózindik stıl, ıdeıalar men ótkir fılosofıalyq mán jatqan talantty boıjetkenniń týyndylarynda qazaqtyń oıý-órnekteri men áshekeıleri óte ádemi úılestirilgen. Dástúrli elementterdi de zamanaýı trendtermen baılanystyryp sheber qoldana bilgen.
Jetistikke jetý úshin tabandylyq, iskerlik, talǵampazdyqpen qosa bilim qajet degen jas dızaıner sán álemine basqan qadamy jaıynda bylaı deıdi:
– KFW ulttyq sán aptalyǵynyń bıylǵy maýsymynda KIVAZ brendimen Bayan dep atalatyn alǵashqy, debúttik toptamamdy usyndym. Bul meniń sán álemine dızaıner retinde attaǵan alǵashqy qadamym desem de bolady. KIVAZ – saq tilinen aýdarǵanda «qorǵanys», «kúsh», «batyldyq» jáne «tózimdilik» sekildi birneshe maǵynany bildiredi, – deıdi ol.
Toǵjannyń týyndylarynda ulttyq boıaý bar. Ol qazirgi jastardyń etnostılge qyzyǵýshylyǵy artyp kele jatqanyn eskerip, týyndylarynyń barlyǵyn suranysqa beıimdep ázirlegenin aıtady.
– Kıim úlgilerimniń dızaıny jastardyń talǵamyna saı bolýy úshin oǵan qazaq halqynyń ǵasyrlar talǵamynan ótken tańbaly órnekterin, baıyrǵy zamannan bastaý alatyn sándik qoldanbaly ónerdi – kesteleý, batık, dymqyl jáne qurǵaq kıiz basý, syryp tigý, quraq quraý tehnıkalaryn paıdalandym. Árbir obrazda matalar faktýrasy, túster jıyntyǵy men sılýettiń san alýandyǵyn oınata otyryp, ejelgi kóshpendi halyqtyń rýhanı negizi men turmys tirshiligin kórsetýge tyrystym. Armanym – aldyńǵy tolqyn aǵa-apalarymyz sekildi ádemilik áleminde qoltańbamdy qaldyryp, óz brendimdi qalyptastyrý, – deıdi Toǵjan.
Iá, sánger jumysynyń basty maqsaty – erekshe obraz jasaý arqyly adamnyń stıliniń daralyǵyn aıqyn kórsetý. Bul rette Toǵjannyń alǵa qoıǵan jospary da kóp. Al olardy júzege asyrý úshin tabandylyq pen sheberliktiń qajet ekeni sózsiz. Máselen, Toǵjan bıylǵy toptamalarynyń eskızderin 2023 jyldyń kúz aıynda bastaǵan. Jalpy daıyndyq pen tigý jumystaryna úsh aıǵa jýyq ýaqyt jumsapty. 
Eńbeginiń nátıjesi sol, jaqynda Toǵjan Núsiptiń KIVAZ brendi men Aıa Núrkenovanyń Na MI Lab brendi Kazakhstan Fashion Week sán aptalyǵy uıymdastyrýshylarynyń qoldaýymen Qyrǵyzstannyń Bishkek qalasynda ótetin Dordoi Plaza Fashion Show 2024 sán aptalyǵyna Qazaqstan atynan qatysady. Jastar úshin bul úlken jetistik! Biz jas dızaınerlerge sán álemindegi juldyzdy sátteri kóp bolsyn dep tilek aıtamyz! 
