Úkimettiń arnaıy qaýlysy jarıalandy. «Samuryq-Qazyna» UÁQ» AQ jyl saıyn «Qazaqstan halqyna» qoǵamdyq qoryna taza tabysynyń keminde 7%-yn aýdaryp otyratyn bolady.
Qarajatty bólý tártibin retteıtin erejeler QR Úkimetiniń qaýlysymen bekitildi, dep habarlaıdy Almaty-akshamy.kz Azattyq Ruhy-na silteme jasap.
Qaýlyǵa sáıkes, «Qazaqstan halqyna» qory aýdarylǵan qarajatty belgilengen maqsatqa baǵyttaýǵa tıis. Aıta ketý kerek, búginde qor alty baǵyt boıynsha 25-ten astam qaıyrymdylyq baǵdarlamasyn júzege asyrady, olardyń ishinde medısına, bilim berý, sport, mádenıet, áleýmettik qoldaý, sondaı-aq tótenshe jaǵdaılar kezinde kómek kórsetý salalary bar.
«Atap aıtqanda, naýqastardy dári-dármekpen, jastar men múgedektigi bar balalardy ınovasıalyq protezdik-ortopedıalyq buıymdarmen qamtamasyz etý, aýylda negizgi mektepter, erte aralasý ortalyqtary, aýtızmmen aýyratyn balalarǵa arnalǵan ortalyqtardy qurý, medısınalyq uıymdardy zamanaýı quraldarmen jabdyqtaý, aýyl mektepteriniń túlekterine jáne halyqtyń áleýmettik osal toptaryna kiretin oqýshylarǵa bilim granttaryn usyný baǵdarlamalary bar», - delingen Úkimettiń baspasóz qyzmeti taratqan habarlamada.
Eske sala keteıik, jyl saıyn «Samuryq-Qazyna» qorynyń taza tabysynyń kem degende 7%-yn «Qazaqstan halqyna» qoǵamdyq qoryna aýdarý týraly bastamany Memleket basshysy «Ádiletti memleket. Birtutas ult. Berekeli qoǵam» atty halyqqa Joldaýynda aıtqan bolatyn.