Qazaqstanda jol qozǵalysyna qatysyp júrgen qos dóńgelekti kólik quraldaryn – elektrosamokattar men velosıpedterdi zańnamalyq turǵyda retteý máselesi qarastyrylyp jatyr. Bul týraly Májilis kýlýarynda İshki ister mınıstriniń orynbasary Sanjar Ádilet málimdedi.
«Qazirgi tańda samokat pen velosıpedterge qatysty arnaıy zertteý júrgizilip jatyr. Jolda beıbereket júretin mundaı kólik túrlerin retke keltirý úshin tıisti usynystar daıyndalyp, zańnamalyq túzetýler engizilýi múmkin», – dedi vıse-mınıstr.
Mınıstrlik ókiliniń aıtýynsha, bul bastama — qala kóshelerindegi qozǵalys qaýipsizdigin qamtamasyz etý, jaıaý júrginshiler men júrgizýshiler arasynda tártip ornatý maqsatynda qolǵa alynyp otyr.
Elektrosamokattar men velosıpedter sońǵy jyldary úlken qalalarda kólik keptelisin aınalyp ótýdiń yńǵaıly sheshimine aınaldy. Alaıda olardyń kóbisi arnaıy tirkeýsiz, jol erejesine baǵynbaı qozǵalady. Osyǵan baılanysty memlekettik nómir engizý — ıelerin jaýapkershilikke tartý tetigi retinde qarastyrylýda.
Eske salaıyq, 2023 jyly qabyldanǵan zańǵa sáıkes, 25 km/saǵ jyldamdyqtan asatyn elektrosamokattar mopedke teńestirilip, olardy tirkeý men memlekettik nómir taǵý tártibi engizilgen bolatyn. Jańa bastama bul talaptardy barlyq qos dóńgelekti qurylǵylardyń barlyǵyn qamtýy múmkin.