2025 jylǵy 16 sáuírdegí Syrtqy sauda sayasaty jáne halyqaralyq ekonomıkalyq ūıymdarǵa qatysu máselelerí jóníndegí vedomstvoaralyq komıssıyanyń sheshímímen auyl sharuashylyǵy januarlarynyń terísí men júnín eksporttauǵa salynatyn kedendík baj salyǵyn alyp tastau maqūldandy.
Būl jeńíldík úsh jyl merzímge engízílíp, keıín qaıta qarau múmkíndígí saqtalady, dep habarlaıdy aqshamnews.kz.
Sheshímníń basty sebebí — óndíríletín shıkízattyń edáuír bólígí íshkí naryqta sūranysqa ıe emes. Atap aıtqanda, terí men júndí óńdeu jáne eksporttau deńgeıí álí de tómen deńgeıde qalyp otyr.
Auyl sharuashylyǵy tauaryn óndírushílerdí yntalandyru jáne óńdeu kásíporyndarynyń júktemesín qamtamasyz etu maqsatynda, óńdeuge ótkízílgen shıkízatqa subsıdıya beru túrínde memlekettík qoldau sharalary qarastyrylyp jatyr.
Terí men júnge salynatyn eksporttyq baj salyǵyn alyp tastau, eń aldymen, írí jáne ūsaq mal ósíretín fermerlerdíń shyǵyndary men qaldyqtardy joyuǵa jūmsalatyn shyǵystardy azaıtuǵa, óndírístík-bólu tízbekterín damytuǵa, ótkízu naryqtaryn keńeıtuge, sondaı-aq auyl sharuashylyǵy shıkízatyn óndírushí jáne eksporttaushy otandyq kásípkerlerdíń básekege qabílettílígín arttyruǵa yqpal etedí.
Qazírgí tańda QR Ūlttyq ekonomıka mınıstríníń 2016 jylǵy 27 aqpandaǵy būıryǵyna sáıkes, qoldanystaǵy eksporttyq baj salyǵy mólsherí mynadaı:
•írí jáne ūsaq mal terílerí men basqa da óńdelmegen terílerdíń eksportyna — tonnasyna 200 euro;
•jún eksportyna — 10%, bíraq tonnasyna kemínde 50 euro.
Íshkí naryq qajettílígí men terí-jún eksporty arasyndaǵy teńgerímdí saqtau maqsatynda Auyl sharuashylyǵy mınıstrlígí jaǵdaıdy tūraqty baqylauda ūstap otyrady jáne qajet bolǵan jaǵdaıda óńdeu salasyndaǵy ınvestıtsıyalyq jobalardy eskere otyryp, tıístí sharalardy jedel túrde qabyldaıdy.