Burynǵy general-leıtenant Samat Ábish shartty túrde segiz jylǵa sottaldy
Nursultan Nazarbaevtyń nemere inisi, Ulttyq qaýipsizdik komıteti tóraǵasynyń eks-birinshi orynbasary Samat Ábish «Qańtar oqıǵasy» boıynsha kináli dep tanyldy. Bul týraly Májilis depýtaty Ermurat Bápı Facebook-akkaýntynda «Dat» gazetine shyqqan maqaladan úzindi keltirip jarıalady, dep habarlaıdy almaty-akshamy.kz.
«26 aqpan kúni Nursultan Nazarbaevtyń nemere inisi, Qazaqstan Respýblıkasy Ulttyq qaýipsizdik komıteti tóraǵasynyń eks-birinshi orynbasary Samat Ábish jabyq sottyń sheshimimen segiz jylǵa shartty túrde sottaldy. Onyń general ataǵy men memlekettik marapattary alyndy. Biraq menshik-múlkine konfıskasıa jasalmady», – delingen jazbada.
Onyń jazýynsha, buǵan deıin Qazaqstanda eshkim segiz jylǵa shartty túrde sottalmaǵan.
Bas prokýrordyń orynbasary Áset Shyndalıev Samat Ábish isine qatysty qosymsha aqparat bergen bolatyn.
«Men tek istiń sotta qaralyp jatqanyn bilemin. Ol – Qazaqstanda. Buǵan deıin odan eshqaıda ketpeý týraly qolhat alynǵan. Qalǵanyn aıta almaımyn. İs sotta qaralyp jatqandyqtan, onyń mártebesi sottalýshy», – dedi Áset Shyndalıev.
Sondaı-aq qylmystyq iste memlekettik qupıa baryn atap ótti.
Byltyr qazan aıynda Bas prokýrordyń orynbasary Áset Shyndalıev Nazarbaevtyń nemere inisi eshqaıda ketpeý týraly qolhatpen júrgenin aıtty. Onyń pikirinshe, tergeýshiler onyń qashyp ketpeıtinine senimdi bolýy múmkin.
«Tergeý organdary tergeý jumystaryna súıenedi. Olar onyń eshqaıda qashpaıtynyna senimdi bolsa kerek. Ol qylmystyq qýdalaý organdary aldyndaǵy zań boıynsha ózine júktelgen mindetteriniń eshqaısyn buzbaǵan bolýy múmkin. Sondyqtan oǵan basqa bultartpaý sharasyn qoldaný týraly másele týyndamaǵan», – dedi ol.
Onyń aıtýynsha, tergeý amaldary júrip jatyr. Basqa tergeý derekteri jarıalanbaıdy.
2023 jylǵy qyrkúıekte Bas prokýratýra Samat Ábishke qatysty tergeýdi bastady. Ol Qańtar oqıǵasy kezinde laýazymdy ókiletin asyra paıdalandy degen kúdikke ilingen. Aqparatqa sáıkes, tergeý barysynda qupıa qujattar zerdelenip jatyr. Bas prokýratýra Konstıtýsıaǵa zań men sot aldynda barlyq azamat teń ekenin eske salǵan.
UQK Tóraǵasynyń eks-orynbasary Samat Ábish 2022 jyly 17 qańtarda qyzmetinen bosatylǵan edi. Al 2022 jylǵy 22 maýsymda UQK tóraǵasynyń orynbasary Asqar Ámerhanov Samat Ábishten jaýap alynyp jatqanyn habarlaǵan.
«Samat Ábish te tergeý orbıtasynda. Ol kýálik berip jatyr, biraq men onyń statýsyn bilmeımin», – degen edi ol.
Samat Ábish – Qazaqstannyń eks-prezıdenti Nursultan Nazarbaevtyń nemere inisi. Onyń aǵasy Qaırat Satybaldy 2022 jylǵy qyrkúıekte alty jylǵa sottalǵan bolatyn.