QR Qarjy mınıstrligi Memlekettik kirister komıteti jalpyǵa birdeı belgilengen salyq salý rejıminde jumys isteıtin kásipkerler men kompanıalardy ákimshilendirýdi jalǵastyrýda. Bul rette salyqtyq mindettemelerin durys oryndamaı, ózara esep aıyrysý arqyly kiristerin tómendetetin salyq tóleýshilerge erekshe nazar aýdarylyp otyr. Bul týraly Aqshamnews.kz saıty habarlaıdy.
Júrgizilgen taldaý nátıjesinde 633 salyq tóleýshige kiristerin tómendetý belgileri boıynsha habarlama jiberilgen. Olardyń qatarynda 172 qurylys salasyndaǵy kompanıalar (onyń ishinde iri qurylys kompanıalary da bar), 102 saýda jáne basqa da qyzmet túrlerimen aınalysatyn kásiporyndar bar.
Búgingi tańda, 12 naýryzdaǵy málimet boıynsha, kásipkerler qosymsha eseptilik nysandaryn tapsyryp, salyqtaryn tolyqtyrýda. Qazirdiń ózinde 17 mlrd teńge salyq tólendi. Bul tizimge BI Group jáne BAZIS sıaqty iri qurylys kompanıalary da kirip otyr. Memlekettik kirister komıteti derekterdi salystyrý jáne tekserý jumystaryn jalǵastyrýda.
Sonymen qatar, qurylys salasynda jumys isteıtin birqatar iri kompanıalar qarjylyq ashyqtyqty qamtamasyz etý jáne kóleńkeli sqemalardy joıý maqsatynda sıfrlyq sheshimderdi ázirleýge jáne qarjylandyrýǵa bastamashylyq jasaýda.
QR QM Memlekettik kirister komıteti barlyq salyq tóleýshilerdi salyq zańnamasynyń talaptaryn qatań saqtaýǵa shaqyrady. Eger jiberilgen habarlamalar boıynsha tıisti sharalar qabyldanbasa, salyq organdary keshendi salyqtyq tekserýler júrgizý týraly bastama kóteretin bolady.