Qazaqstan Respýblıkasy Syrtqy ister mınıstrliginiń Investısıalar komıtetiniń tóraǵasy Ǵabıdolla Ospanqulov pen «Kazakh Invest» ulttyq kompanıasynyń AQSH-taǵy sheteldik ókili Marat Birimjannyń qatysýymen tehnologıalyq sheshimder, ónerkásip, densaýlyq saqtaý jáne energetıka salalaryndaǵy iri amerıkalyq kompanıalardyń basshylyǵymen birqatar kezdesýler ótkizildi.
Atalǵan kezdesýlerde Qazaqstannyń ınvestısıalyq áleýeti, tehnologıalyq almasý jáne óndiristi jergiliktendirý máseleleri talqylandy, dep habarlaıdy aqshamnews.kz SİM saıtyna silteme jasap.
Mańyzdy kezdesýlerdiń alǵashqysy «Honeywell Technology Experience Center» ortalyǵynyń ókilderimen ótkizildi. Kezdesý barysynda ónerkásiptik avtomattandyrýdaǵy ınovasıalyq sheshimder, balamaly avıaotyn óndirý, óndiristi sıfrlandyrý jáne Qazaqstanda ozyq tehnologıalardy engizý máseleleri talqyǵa salyndy.
Álemdegi jetekshi agroónerkásiptik «Archer Daniels Midland» korporasıasymen ótken kelissózder barysynda aýyl sharýashylyǵy ónimderin qaıta óńdeý, agrosektorǵa ozyq tehnologıalardy engizý jáne eksporttyq jetkizilimderdi keńeıtý múmkindikteri talqylandy. Bul kezdesýde qazaqstandyq tarap astyqty qaıta óńdeý jáne ósimdik maıyn óndirý boıynsha áleýetti jobalardy tanystyryp, osy salalardaǵy óndiristi Qazaqstanda jergiliktendirýge qolaılyǵy týraly atap ótti.
Oǵan qosa «Pfizer» kompanıasymen ótken kezdesýdiń basty taqyryby Qazaqstandaǵy farmasevtıka salasyn damytý, zamanaýı bıotehnologıalardy engizý jáne dárilik zattar óndirisin jergiliktendirý máseleleri jaıly boldy.
Sondaı-aq tehnologıalar, qaýipsizdik jáne sıfrlyq sheshimder salasyndaǵy iri amerıkalyq kompanıa «Leidos»-pen kelissózder ótti. Bul kezdesýde ıntellektýaldy kólik júıeleri úshin tehnologıalyq sheshimderdi damytý, mańyzdy ınfraqurylym men ónerkásipti qorǵaý, Qazaqstanda ozyq kıberqaýipsizdik júıelerin engizý múmkindikteri talqylandy.
Budan bylaı qazaqstandyq delegasıa ókilderi AQSH-tyń sý tehnologıalary salasyndaǵy jetekshi kompanıasy «Xylem»-men kezdesý ótkizdi. Atalǵan kezdesý sý resýrstaryn basqarý, sý tazartý jáne sapasyn baqylaýdyń ınovasıalyq júıelerin engizý boıynsha birlesken bastamalardy talqylaýǵa arnaldy. Qazaq tarapy sýmen jabdyqtaý jáne sý burý ınfraqurylymyn jańǵyrtý úshin «Xylem» kompanıasynyń ozyq sheshimderin paıdalanýǵa múddelilik tanytty.
Kezdesýlerdiń qorytyndysy boıynsha Ǵ.Ospankulov amerıkalyq kompanıalarmen ınvestısıalyq yntymaqtastyqty tereńdetýge daıyndyǵyn rastap, amerıkalyq tarapqa negizgi salalarda jobalardy iske asyrý úshin qolaıly jaǵdaılar men tıimdi qoldaý tetikterin usyndy.