Memlekettik kirister komıteti mıkro- jáne shaǵyn bıznes sýbektileri bergen baqylaý-kassa mashınalarynyń fıskaldyq chekteri boıynsha syıaqylar tóleýge baǵyttalǵan «Salyq keshbek» pılottyq jobasynyń 2025 jylǵy 15 naýryzda qaıta bastalady , dep habarlaıdy aqshamnews.kz .
Jobanyń birinshi kezeńi oń nátıje kórsetti:
- Fıskaldyq chekter sany eki esege artty;
- Bul chekter boıynsha somma 32%-ǵa ósti (2024 jylǵy 2 jartyjyldyq 2023 jylǵy 2 jartyjyldyqpen salystyrǵanda).
Joba Semeı qalasynda, Abaı oblysynda jáne Aqkól aýdanynda iske asyryldy. Endi ekinshi kezeńde jobanyń júzege asyrylý aýqymy keńeıip, tómendegideı jańa aýmaqtardy qamtıtyn bolady:
- Óskemen qalasy, Shyǵys Qazaqstan oblysy;
- Jetiqara aýdany, Qostanaı oblysy;
- Jaqsy aýdany, Aqmola oblysy;
- Arshaly aýdany, Aqmola oblysy.
«Salyq keshbek» jobasyna qatysý úshin kez kelgen adamǵa múmkindik beriledi. Ol úshin:
- Taýarlar men qyzmetterge aqy tólegende (qolma-qol aqshamen nemese qolma-qol aqshasyz tásilmen) fıskaldyq chek alý qajet;
- «Amian» arnaıy mobıldi qosymshasynda chektiń shtrıh-kodyn skanerlep, satyp alý somasynyń 2% mólsherinde syıaqy alýǵa bolady.
Syıaqylar «IT Analytics» JSHS operatory arqyly esepteledi. «Amian» mobıldi qosymshasyn App Store jáne Google Play dúkenderinen tegin júktep alýǵa bolady.
Memlekettik kirister komıteti kásipkerlerdi baqylaý-kassa mashınalaryn belsendi paıdalanýǵa jáne árbir satyp alýshyǵa fıskaldyq chekter berýge shaqyrady. Bul tutynýshy quqyǵyn qorǵaýǵa jáne memlekettik bastamalardy qoldaýǵa yqpal etedi.