Osydan týra bir jyl buryn Qazaqstannyń ulttyq bitimgerlik kontıngenti Birikken Ulttar Uıymynyń bólingen aýmaqty baqylaý kúshteri quramynda mindetterdi oryndaýǵa Sırıa Arab Respýblıkasyna jiberildi. Bul mısıa Qazaqstan Respýblıkasy bitimgerleriniń alǵashqy derbes operasıasy boldy.
Ózara túsinistik týraly memorandýmǵa jáne mısıanyń mandatyna sáıkes, Qazaqstan kontıngenti óńirdegi turaqtylyq pen qaýipsizdikti qamtamasyz etýde mańyzdy ról atqarýda, dep habarlaıdy aqshamnews.kz Qorǵanys mınıstrligine silteme jasap.
Qazaqstan Prezıdenti – Qazaqstan Respýblıkasy Qarýly Kúshteriniń Joǵarǵy Bas qolbasshysy Qasym-Jomart Toqaev bitimgerlik kúshterdiń áleýetin arttyrýdyń mańyzdylyǵyn aıta kelip, BUU-men bitimgerlik salasyndaǵy yntymaqtastyq Qazaqstannyń syrtqy saıasatynyń ajyramas bóligi ekenin atap ótti.
Faýar bazasyndaǵy mısıany oryndaý kezinde bitimgerlik kontıngent 557 tapsyrma oryndady, onyń ishinde Izraıl men Sırıa arasyndaǵy atysty toqtatý týraly kelisimniń saqtalýyn qadaǵalaý, jaýapkershilik aımaǵyndaǵy bitimgerlik bazalarynan áskerı personaldy evakýasıalaý, baqylaýdaǵy aýmaqty mobıldi patrúldeý, jarylmaǵan oq-dárilerdi joıý men basqa da jarylǵysh zattardan tazartý, BUU-nyń personaly men joǵary laýazymdy tulǵalaryn jaýapkershilik aımaǵynda jáne BUU-nyń onyń shekteýli aýmaqtarynda alyp júrý kirdi.
Qazaqstandyq bitimgerlerdiń Sırıadaǵy shıelenisken jaǵdaıda ózderiniń alǵashqy derbes mısıasyn oryndaǵany erekshe mańyzdy. Jaýapkershilik aımaǵynda shıelenis artqan kezde Qazaqstan kontıngenti kóterilisshilerdiń ony basyp alýyna jol bermeı, bazany berik ustaýda sheshýshi ról atqardy.
Jedel áreket etý toby BUU basshylyǵy mer qyzmetkerlerin Damaskiden "Faýar" bazasyna úsh ret evakýasıalap, personaldyń qaýipsizdigin jáne BUU múlkiniń saqtalýyn qamtamasyz etti.
Birikken Ulttar uıymynyń basshylyǵy qazaqstandyq bitimgerlerdiń kórsetken batyldyǵy men tabandylyǵyn joǵary baǵalady.