QR Eńbek jáne halyqty áleýmettik qorǵaý mınıstrligi úzdik eńbek áýletteri men óndiris jumyskerlerin anyqtaýǵa baǵyttalǵan «Eńbek joly» respýblıkalyq konkýrsynyń óńirlik kezeńine qatysý úshin ótinimderdi qabyldaý bastalǵanyn habarlaıdy.
Buǵan deıin habarlanǵandaı, Memleket basshysy 2024 jylǵy 2 qyrkúıektegi Qazaqstan halqyna Joldaýynda 2025 jyldy – Jumysshy mamandyqtar jyly dep jarıalady.
«Eńbek joly» baıqaýy elimizdegi Eńbek kúnin merekeleýge jáne «Eńbek adamyn» qurmetteýge oraılastyrylǵan. Ol ónimdi eńbekti yntalandyrýǵa, jastar arasynda jumysshy mamandyqtaryn nasıhattaýǵa jáne jumysshy áýletterdiń kópjyldyq dástúrlerin nyǵaıtýǵa baǵyttalǵan, dep habarlaıdy aqshamnews.kz.
Konkýrs jyl saıyn eki kezeńde – óńirlik jáne respýblıkalyq deńgeıde, úsh nomınasıa boıynsha ótkiziledi: «Úzdik eńbek áýleti» – eń uzaq eńbek ótili bar, eń kóp marapattarǵa ıe eń úlken áýlet tańdalady; «Óndiristiń úzdik jas jumyskeri» – 5 jyldan aspaıtyn jumys ótili bar óndiristiń eń belsendi jáne eńbekqor jumyskeri tańdalady; «Jumys isteıtin jastardyń úzdik tálimgeri» – keminde 20 jyl jumys ótili bar eń belsendi jáne tıimdi tálimger tańdalady.
Konkýrsqa ónerkásip salasyna qaramastan barlyq kásiporyndardyń jumyskerleri qatysa alady.
Konkýrstyń óńirlik kezeńiniń jeńimpazdaryn oblystar men respýblıkalyq mańyzy bar qalalar ákimderi orynbasarlarynyń tóraǵalyǵymen komısıalar aıqyndaıdy. Konkýrstyń respýblıkalyq kezeńiniń jeńimpazdaryn quramyna QR Parlamentiniń depýtattary, respýblıkalyq kásipodaqtar birlestikteriniń jáne jumys berýshilerdiń ókilderi kiretin Eńbek jáne halyqty áleýmettik qorǵaý mınıstrligi janyndaǵy komısıa aıqyndaıdy.
Eńbekmıni eńbek áýletteriniń ókilderin de, bastamashyl jas jumyskerler men olardyń tálimgerlerin de konkýrsqa belsendi qatysýǵa shaqyrady.
Osy saıys jóninde tolyǵyraq aqparat alý úshin oblystar men Astana, Almaty jáne Shymkent qalalary ákimdikteriniń jumyspen qamtýdy úılestirý jáne áleýmettik baǵdarlamalar basqarmasyna habarlasýyńyz kerek.