Memleket basshysynyń Jalpyǵa birdeı deklarasıalaý tásilderin qaıta qaraý týraly tapsyrmasyn iske asyrý úshin elimizden tys aktıvteri bar adamdardy qospaǵanda, azamattardyń osy sanatyn aktıvteri men mindettemeleri týraly deklarasıalardy usynýdan bosatý usynylyp otyr.
Buǵan memlekettik organdardyń derekter bazasyn sıfrlandyrý, qolma-qol aqshasyz tólemderdiń joǵary úlesi (86%), avtomattandyrylǵan salyqtyq baqylaý, halyqaralyq kelisimder sheńberinde qarjylyq shottar boıynsha derekter almasý, sondaı-aq sıfrly qyzmetterdiń keń qoljetimdiligi yqpal etip otyr.
Qarjy mınıstrligi shetelde aktıvteri bar tulǵalarǵa, saılaýǵa túsýge quqyǵy bar azamattarǵa, memlekettik laýazymǵa ornalasýǵa jáne olarǵa teńestirilgen kandıdattar úshin, sondaı-aq bankterdiń, baǵaly qaǵazdar naryǵynyń, saqtandyrý uıymdarynyń iri qatysýshylary bolǵysy keletinder úshin aktıvter men mindettemeler týraly deklarasıany (250.00 SEN) usyný jónindegi mindetti saqtaýdy usynyp otyr.
Sondaı-aq azamattarǵa aktıvter men mindettemeler týraly deklarasıany óz erkimen usyný quqyǵy beriletinin aıta keteıik.
Bul rette memlekettik qyzmetshilerge, kvazımemlekettik jáne jeke kompanıalardyń basshylaryna, quryltaıshylarǵa (onyń ishinde 25% astam jáne odan da kóp aksıa ıelenýshilerge), olardyń jubaılaryna, sondaı-aq Qazaqstan Respýblıkasynan tys jerlerde aktıvteri bar jáne (nemese) derbes salyq salynatyn tabys alǵan adamdarǵa kiristeri men múlki týraly jyl saıynǵy deklarasıany (270.00 SEN) tapsyrý jónindegi mindet saqtalatynyn aıta ketý kerek.
Qosymsha quny 20 000 AEK (74 mln teńge) asatyn iri satypalym jasaǵan tulǵalar úshin osyndaı mindetti belgileý usynyldy.
Esterińizge sala keteıik, kúni keshe elimizde el turǵyndarynyń 90 %-y kele jyldan bastap deklarasıa tapsyrýdan bosatylatyny týraly jarıalanǵan bolatyn.