Almatynyń tártip saqshylary "Almaty marafonyna" daıyndalýda
Tártip saqshylary bul joly 10 shaqyrymdyq “Winter Runǵa” qatysty, dep habarlaıdy Almaty-akshamy.kz Polisia.kz-ke silteme jasap.
«Men 2017 jyldan beri júgirýmen aınalysamyn. “Almaty marafonynyń” turaqty qatysýshysymyn. Qyrkúıekte 42 shaqyrymdy 3 saǵat 20 mınýtta júgirip óttim. Men barlyǵynyń júgirgenin qalaımyn. Júgirý – bul densaýlyq, ol ımýndyq júıeni nyǵaıtady. Bul jaqsy mádenıet, jan-jaqty damýǵa, jańa tanystardy tabýǵa yqpal etedi. Óte paıdaly», – deıdi Almaty qalalyq PD tylmen qamtamasyz etý basqarmasynyń qyzmetkeri Áden Mádenov.
«Men bir jyldan beri marafondarǵa qatysamyn. Munyń aldynda jazda 42,2 shaqyrymǵa júgirgen edim. Meniń eń jaqsy nátıje kórsetken marafonym boldy. Men ómirimde sportty janyma serik etip kelemin. Otbasym da sportqa óte jaqyn. Biz salaýatty ómir saltyn jaqtaımyz», – dedi Almaty qalalyq PD JÁAJ ınspektory, dzúdo jáne sambodan sport sheberi, Qazaqstannyń birneshe dúrkin chempıony Qarashash Esdáýletova.
Aıtpaqshy, Almatynyń polısıa qyzmetkerleri “Almaty marafonynyń” turaqty qatysýshylary. Bul jaqsy dástúrge aınaldy.
«Maqsat – Almaty qoǵamdastyǵynyń qaıyrymdylyq bastamasyn qoldaý, óıtkeni biz osy qalanyń turǵyndarymyz. Polısıa qyzmetkerleri retinde shahardaǵy tártipti qorǵaýǵa jáne azamattardyń konstıtýsıalyq quqyqtaryn qorǵaýǵa ant berdik. Ekinshiden, másele salaýatty ómir saltyn nasıhattaý týraly bolyp otyr. Qyzmetter men bólimshelerdiń qyzmetkerleri ár ýaqytta ózderiniń sporttyq daıyndyǵynyń deńgeıin, ustamdylyǵy men tártibin kórsetip keledi», – dedi Almaty qalalyq polısıa departamenti bastyǵynyń orynbasary Oljas Myrzabekov.
Almaty qalalyq PD-de áýeli jarysqa polısıa qyzmetkerlerin kóbirek tartý josparlanǵanyn atap ótti.