Qar men muzdan tazartý jumystary bastaldy.
Indýstrıa mınıstrligi sý tasqyny kezeńine daıyndyqty baqylaýdy kúsheıtti. Bul týraly QR Úkimetiniń otyrysynda vedomstvo basshysy Qaıyrbek Óskenbaev málimdedi, dep habarlaıdy Almaty-akshamy.kz.
«Mınıstr avtomobıl joldaryn sý tasqyny kezeńine daıyndaý aıasynda arnaıy is-sharalar jospary bekitilgenin aıtty», - delingen Indýstrıa mınıstrliginiń baspasóz qyzmetiniń habarlamasynda.
Oǵan sý tasqyny qaýpi bar ýchaskelerdi kúndelikti tekserý, júrý bóligin, jol jıekterin, sý ótkizý qubyrlarynyń tesikteri men arnalaryn qar men muzdan tazartý, sý tasqynyna qarsy jáne avarıalyq jumystardy júrgizý úshin jol jáne ınertti materıaldardy daıyndaý jumystary kiredi.
«Joldarǵa táýlik boıy kezekshilik etý jáne patrúldeý uıymdastyryldy, sý ótkizý qubyrlary men kópir asty aımaqtarynyń arnalaryn qar men muzdan tazartý bastaldy. 278 qaýipti ýchaske, 84 kópir jáne 883 sý ótkizý qubyry erekshe baqylaýda. Olarǵa 700-den astam jol-paıdalaný tehnıkasy bekitilgen. Sý tasqynyna qarsy sharalardy oryndaý kezinde óńirlerdiń klımattyq jaǵdaılary, sondaı-aq ótken jyldardaǵy sý tasqyny kezeńiniń nátıjeleri eskeriledi», - dep baıandady Qaıyrbek Óskenbaev.
Sý tasqyny qaýpin joıý úshin, mınıstrdiń málimetinshe, qazirgi ýaqytta materıaldardyń 80%-y, onyń ishinde 4 myń tekshe metr qum, 7 myń tekshe metr tas, 20 myń tekshe metr qıyrshyq tas, 50 myń qap jáne 434 tonna JJM daıyndaldy.
Vedomstvo basshysy sý tasqyny qaýpi bar ýchaskelerdegi avtojoldardy qaıta qurý jáne jóndeý barysynda jumysshylar sý ótkizetin qubyrlardyń kóp mólsherin ornatatynyn nemese olardyń dıametrin arttyratynyn atap ótti.