Sáken pikir bildirdi
Bokstan álem chempıony ári Olımpıadanyń qola júldegeri Sáken Bıbosynov bıylǵy maýsymdy qorytyndylap, aldaǵy jylǵa qatysty josparlaryn bólisti, dep habarlaıdy Almaty-akshamy.kz
«Osy maýsymnyń men úshin asa tabysty ótkenine kúmánim joq. Azıa birinshiliginen qola aldym. Tokıoda altyn alýdy maqsat etsem de, oıym júzege aspaı, qola medalmen oraldym elge. Keıin Belgradtaǵy álem chempıonatynda altyn alyp, elimizdiń Ánuranyn shyrqattym. "Jyldyń úzdik sportshysy" atanǵanym taǵy bar.
Endi munyń bárine toqmeıilsip qalýǵa bolmaıdy. Óıtkeni, meniń Olımpıadada top jarsam degen armanym bar. Soǵan naqty qadam basý úshin daıyndyqty qaıtadan kúsheıtemin. Kelesi jyly kóptegen iri jarystar bar. Sonyń biri - Jazǵy Azıa oıyndary.
El namysy synalatyn shaqta aıanyp qalmaýymyz kerek. Sondyqtan, keler jylǵa qoıǵan maqsattarym da bıik», - deıdi Bıbosynov.