«Pavlodar ózen porty» AQ merdiger uıymy Saıran kólin qaıta jańǵyrtý jumystarynyń qazirgi deńgeımen tanystyrdy, dep habarlaıdy aqshamnews.kz
Qazir jobanyń negizgi qurylys-montaj jumystary aıaqtaldy. Iaǵnı, : ınjenerlik jeliler (sýarý, sýmen jabdyqtaý, elektrmen jabdyqtaý jáne syrtqy jaryqtandyrý júıeleri) salyndy, jaǵalaý jelileri nyǵaıtylyp, bóget salynǵan. Aýmaqty kógaldandyrý jumystary aýqymdy deńgeıde júrgizilgen: 3 400-den astam aǵash, 15 000-ǵa jýyq buta men gúlzar otyrǵyzylyp, jalpy kógaldandyrylǵan aýmaq kólemi 261 myń sharshy metrge jetken.
Joba qazir sońǵy satyǵa ótti. Sońǵy kezeńde jaǵajaı aımaǵyn retke keltirý, trotýar plıtalary men asfált tóseý, shaǵyn arhıtektýralyq pishinderdi ornatý jumystary júrgizilip jatyr.
Merdiger uıymnyń ókili, joba jetekshisi Renat Zılmýhamedovtyń aıtýynsha, qazirgi tańda nysanda kóldi abattandyrý men sý toltyrýǵa baılanysty qorytyndy sharalar atqarylyp jatyr. Alaıda, qurylysshylar jumys barysynda ınjenerlik jáne tehnıkalyq kedergilerge jıi tap bolýda. Ásirese, aýa raıynyń qolaısyzdyǵy, joǵary ylǵaldylyq pen turaqsyz temperatýra sándik lotostarǵa arnalǵan baseın túbine suıyq gıdrooqshaýlaǵysh membrana jaǵýǵa kedergi keltirip otyr.
Aýmaqtyń jer túzilisi de birqatar qıyndyqtar týǵyzdy. Ýchaske basshysy Aleksandr Karandasovtyń aıtýynsha, jobalaý toby betkeılerde jumys istegen kezde standarttan tys ınjenerlik sheshimder qabyldaýǵa májbúr bolǵan.
«Mundaǵy topyraqtar aýyr, sondyqtan olar túgel aýystyryldy, qazylǵan topyraq alynyp, qurylym úshin neǵurlym turaqty balas jasaldy. Búgingi tańda Almaly aýdany tarapynan jaǵalaýdyń shyǵys bóliginde jumystar tolyǵymen aıaqtaldy. Áýezov aýdany boıynsha sýarý júıesi jumystary júrgiziledi. Saıran kólin sýmen toltyrǵan kezde gıdroónimder otyrǵyzý júzege asatyn bolady», - dedi Aleksandr Karandasov.
Jobanyń bas sáýletshisi ári avtory Nellı Lapteva aýmaqtaǵy topyraqtyń quramyna taldaý jasap berdi. Onyń aıtýynsha 1971 jyldary bul ara qum men qıyrshyq tas óńdegen oryn bolǵan, sondyqtan topyraǵy qunarly topyraqqa jatpaıdy.
Sapaly gıdrooqshaýlaǵysh materıaldardyń keshigip jetkizilýi de jobaǵa qolbaılaý bolyp kelgen.
«TMD elderinde sertıfıkattalǵan gıdroızolásıanyń qajetti kólemi tabylmaǵandyqtan, Túrkıadan aldyrýǵa týra keldi. Tapsyrys jańa jylǵa deıin jasalǵan, soǵan qaramastan naqty jetkizetin ýaqyty mamyr aıynyń ortasyna týra keldi. Bul jobanyń qazirgi kezeńin keshiktiretinin bildik, alaıda jobanyń beriktigi men senimdiligi úshin bul qadamǵa sanaly túrde barýǵa týra keldi,– dedi Rınat Zilmuhamedov.
Atalǵan merdiger uıym barlyq daıyndyq sharalaryn aıaqtaǵannan keıin ǵana kóldi sýmen totyrýdy bastaıdy. Sý toltyrý prosesi de kezeńderge bólinip júzege asyrylady. Sý toltyrý jumysy Tóle bı dańǵyly boıyndaǵy shandorda ornalasqan gıdromehanıkalyq qaqpalar arqyly júzege asyrylady.
«2 maýsymda sý toltyrýdy bastaımyz. Bastapqy kezeńde 50 paıyz kóleminde sý toltyrylady. Sol arqyly sýdyń aǵyny men kólemin jáne júıelerdiń jumysyn baqylap kóremiz. Barlyǵy oıdaǵydaı bolsa ary qaraı tolyq toltyrý kezeńine ótemiz», – dep túsindirdi Rınat Zilmuhamedov.
Jobanyń sońǵy kezeńinde mediger uıym atqaratyn jaǵajaı aımaǵynyń qaýipsizdigin tekserý, sýarý júıesin tolyq retke keltirý, usaq aqaýlardy joıý jáne landshaftty jumystardy tolyq aıaqtaý syndy qosymsha mindetteri bar.
Qaıta jańǵyrtylǵan Saıran kóli barlyq qajetti synaqtar men sý toltyrý jumystaryn aıaqtaǵannan keıin qala turǵyndarynyń ıgiligine beriletin bolady.