Q.I. Sátbaev atyndaǵy Qazaq ulttyq tehnıkalyq zertteý ýnıversıtetiniń akt zalynda Almaty jastarynyń asyǵa kútken bilim básekesi – «IQ-ALA JASTARY» ıntellektýaldy oıynynyń fınaldyq kezeńi ótip jatyr.
Almaty qalasy Jastar saıasaty basqarmasynyń qoldaýymen «Jaýhar» qoǵamdyq qory uıymdastyrǵan zıatkerlik doda Memlekettik rámizder kúnine oraılastyrylǵan.
Jobanyń maqsaty – jastardyń bilimge qushtarlyǵyn oıatý, shyǵarmashylyq qabiletterin shyńdaý, ulttyq qundylyqtardy nasıhattaý.
Ismaıl Nurıslam Orazauly, «Jaýhar» qoǵamdyq qorynyń dırektory:
– Bıyl «IQ-ALA JASTARY» oıynyna myńnan asa jas qatysty. İrikteý kezeńderinde 100-den asa komanda ózara baq synady. Sońǵy fınalǵa ár lıga boıynsha 5 úzdik komandadan iriktelip, 20 komanda joldama aldy. Júlde qory – 1 000 000 teńge. Bul – jastardy yntalandyrýdyń bir joly.
Fınal tórinde tórt túrli sanattaǵy komandalar – stýdentter, jumysshy jastar, belsendi jastar jáne túrli áleýmettik toptar ókilderi ózara bilim men logıka boıynsha synǵa túsip jatyr.
Oıyn barysynda komandalar kúrdeli suraqtarǵa jaýap berip, ózara tyǵyz básekege tústi. Ár qatysýshynyń júzine tolqý men senimdilik qatar uıalaǵan.
Shuǵyla Búrlibaeva, «Aqqý, Shortan hám Shaıan» komandasynyń múshesi:
– Komandamyz birneshe jyldan beri birge oınap keledi. Almatydaǵy túrli ıntellektýaldy jarystarǵa qatysqan tájirıbemiz bar. Keı suraqtar, ásirese tarıhı tastarǵa baılanystysy, qıyn tıdi. Biraq ádil ári tartysty ótip jatqan oıynnyń rýhy erekshe.
Saılaý Ádilet, «Farabı sazy» komandasynyń kapıtany:
– Qobaljý bar, árıne. Biraq atmosfera óte tamasha. Komandalyq jumys kezinde sheshim qabyldaý qıynǵa soǵady. Árkimniń pikiri bar. Sońǵy sheshimdi kapıtan retinde ózim qabyldaımyn. Jeńisten úmitimiz zor.
Joba jastar arasynda erekshe qoldaý tapty. Uıymdastyrýshylardyń aıtýynsha, bul ıntellektýaldyq saıys dástúrli formatqa aınalǵan. Bıylǵy qatysýshylar sany men qyzyǵýshylyq kórsetkishi – sonyń dáleli. Sebebi, mundaı sharalar jastardy bir maqsatqa jumyldyryp qana qoımaı, olardyń bilimge degen umtylysyn arttyryp, bolashaq kóshbasshylardyń qalyptasýyna jol ashady.
P.S. Qazirgi sátte oıyn qyza túsýde. Kim jeńimpaz atanady? Bul suraqtyń jaýaby sálden soń belgili bolmaq.