Almaty ákimi Darhan Satybaldy Almaly aýdanyna jasaǵan jumys sapary aıasynda Saıran sý qoımasy mańyn kórkeıtý jumystarynyń jaı-kúıimen tanysty, - dep habarlaıdy aqshamnews.kz.
Joba aıasynda uzyndyǵy 2,5 shaqyrym bolatyn serýen jolyn, jaǵajaı aımaǵyn, balalar men sport alańdaryn, velosıped jáne skeıtparkterdi salý kózdelgen. Sonymen qatar sanıtarlyq aımaqtar, polısıa men qutqarý beketteri de qarastyrylǵan.
Qala basshysyna óziniń tapsyrmasymen júrgizilgen qala keńistigin qoljetimdi etýge baǵyttalǵan jumystar týraly baıandaldy. Atap aıtqanda, Tóle bı kóshesi boıynda jaǵalaýdan trotýarǵa shyǵatyn ótkel jasalǵan, al Abaı kóshesi jaǵynan pandýs ornatylǵan. Jubanov kóshesiniń eń tik bóliginde múmkindigi shekteýli azamattarǵa arnalǵan jedel saty salý josparlanyp otyr. Buǵan qosa, Varlamov kóshesi jaǵynan jasyl jelekke zıan keltirmeı, balalar arbasyna arnalǵan asfált jol tóselip jatyr.
"Eger biz jańa bir jobany iske asyryp jatsaq, ony birden 10-20 jylǵa laıyqtap jasaýymyz kerek. Áıtpese, biraz ýaqyttan keıin qaıtadan jóndeýge týra keledi. Bul jerde qala turǵyndary men qonaqtary úshin ózine tán erekshe atmosfera qalyptasýy shart. Eger Saırandy jańǵyrtyp, kórkeıtýge kirissek, ol zamanaýı talaptarǵa saı bolýy kerek", – dedi qala ákimi.
Jumys barysynda qosymsha ınjenerlik jáne landshaftyq sheshimder qabyldaý qajettigi týyndaǵan. Bul jobanyń jobanyń sapasyn arttyrady, biraq qurylys merzim sál uzartady.
Buǵan deıin de shahar basshysy bul jobaǵa qatysty birqatar eskertý jasaǵan bolatyn. Atap aıtqanda, merdiger – "Pavlodar ózen porty" AQ-na jumys sapasyna baqylaýdy kúsheıtý tapsyryldy.