Túrkistanda beıbit kúnniń batyrlary «Túrkistan oblysyna sińirgen eńbegi úshin» tósbelgisimen marapattaldy, dep habarlaıdy Almaty-akshamy.kz Inform.kz-ke silteme jasap.
Tósbelgi taqqandardyń ishinde batyrlyqtyń naǵyz úlgisin kórsetken azamattar bar. Solardyń biri - kúni keshe ǵana erliginiń arqasynda elge tanylǵan Qanseıit Muhammed. Saıram aýdandyq halyqty jumyspen qamtý ortalyǵynyń qyzmetkeri Aqsýkent aýylynda ornalasqan ári ózi jumys isteıtin ǵımaratta bolǵan órt kezinde shatyr ústindegi Memlekettik Týdy ottan alyp shyqty.
Al Jetisaı aýdandyq polısıa bólimi mıgrasıa bólimshesiniń basshysy Aıan Haırýllaev ózine tóngen qaýipke qaramaı, beıtanys keıýanany órttiń ortasynan qutqaryp qaldy. Kentaý qalasy, №12 Órt sóndirý bóliminiń bólimshe komandıri, azamattyq qorǵaý aǵa serjanty Nurǵalı Kerimbekov sý qubyryna qulap ketken 2 jastaǵy balany alyp shyqty. Qazyǵurt aýdanynyń turǵyny Meıirbek Rysbek ájethanaǵa túsip ketken 1 jastaǵy balany qutqaryp, eldiń yqylasyna bólendi. Erlik jasaý árkimniń qolynan kele bermeıtindigin aıtqan Túrkistan oblysynyń ákimi Ómirzaq Shókeev beıbit kúnniń batyrlaryna qurmet kórsetti. Batyl azamattar óńir basshysynyń iltıpatyna rızashylyq bildirip, qoǵamnyń damýyna qyzmet etýge daıyn ekenderin jetkizdi.