Atyraý oblysynyń medısına salasynda 201 dáriger jetispeıdi. Bul týraly oblystyq densaýlyq saqtaý basqarmasynyń basshysy Asqan Baıdýálıev málim etti, dep habarlaıdy Almaty-akshamy.kz Inform.kz-ke silteme jasap.
Oblystyq qoǵamdyq keńestiń keńeıtilgen otyrysynda medısına salasyn kadrmen qamtý máselesi qaraldy. Oblystyq densaýlyq saqtaý basqarmasynyń basshysy Asqan Baıdýálıevtiń aıtýynsha, óńirde medısına salasyndaǵy kadr jetispeýshiligin joıý maqsatynda birqatar jumys qolǵa alynǵan.
«Atyraý oblysynyń medısına salasynda 201 dáriger jetispeıdi. Aýrýhanalar men emhanalarda, ózge emdeý oryndarynda reanımatolog, akýsher-gınekolog, ınfeksıonıst, jalpy tájirıbe dárigeri, pedıatr sekildi joǵary bilimdi kadrlardyń orny bos tur. Aýyldyq jerlerdegi medısına mekemelerine 40 dáriger qajet», -dep málim etti basqarma basshysy Asqan Baıdýálıev.
Onyń aıtýynsha, qazir Atyraý oblysynda 6 747 medısına qyzmetkeri jumys isteıdi. Onyń ishinde 1 515 dáriger, 5 232 orta býyn medısına qyzmetkeri turǵyndarǵa medısınalyq kómek kórsetip júr.
«Joǵary medısınalyq oqý ornyn bitirgen Atyraý oblysynyń túlekterin bilikti dáriger retinde bilimin odan ári rezıdentýrada jalǵastyrýyna jaǵdaı jasaý maqsatynda jyl saıyn 70-ten astam grant bólip otyr. Máselen, 2021 jylǵy jeltoqsanda Atyraý oblysynda Aqtóbe qalasyndaǵy M.Ospanov atyndaǵy Batys Qazaqstan medısınalyq ýnıversıtetiniń fılıaly ashyldy. Qazir basqa óńirlerden kelgen 35 rezıdent oblystaǵy medısınalyq mekemelerde jumys istep júr. Qabyldanǵan osyndaı sharalardyń nátıjesinde kadr tapshylyǵy byltyr 2020 jylmen salystyrǵanda 11%-ǵa tómendedi», -dedi Asqan Baıdýálıev.