Jusan Bank-ke memleketten berilgen qarjylaı kómekti birtindep qaıtarý máselesi qarastyrylyp jatyr. Májilis depýtattarynyń saýalyna joldaǵan jaýabynda QR Premer-Mınıstri Álıhan Smaıylov osyndaı málimet aıtty, dep habarlaıdy Almaty-akshamy.kz Inform.kz-ke silteme jasap.
«Jusan Bank-tiń búkil mámilesinen memleketke kelgen shyǵyndy aıtsaq, keıingi 5 jyldyń ishinde táýelsiz sarapshylardyń kómegimen «ATF Bank» AQ-nyń «First Heartland Jusan Bank» AQ-ny satyp alýy týraly mámile usynylǵan bolatyn. 2020 jyly bankter biriktirilip, táýelsiz baǵalaý qorytyndysy (Due Diligence) boıynsha «ATF Banktiń» shyǵyny 124 mlrd teńge dep belgilendi. Bul shyǵyn «ATF Banktiń» jeke qarajaty esebinen jabylǵan. Osy mámile aıasynda «ATF Bank» pen Jusan Bank-tiń buǵan deıin shyǵarǵan oblıgasıalary merzimin uzartý jáne syıaqy mólsherlemesin 4%-dan 0,1%-ǵa deıin túsirý jolymen túrlendirilgen edi», - dep jazylǵan jaýapta.
Úkimet basshysynyń málimeti boıynsha, atalǵan sharanyń arqasynda Jusan Bank-tiń jeńildetilgen syıaqy men naryqtaǵy syıaqynyń aıyrmashylyǵy esebinen 126 mlrd teńge kóleminde qaryz qalyptasqan. Ol aqshanyń bári «ATF Banktiń» shyǵynyn óteýge baǵyttalǵan.
«Sondaı-aq, Jusan Bank aksıonerleri 97 mlrd teńge kóleminde qosymsha kapıtal quıǵan bolatyn. Búgingi tańda Jusan Bank kapıtaly tolysyp, ótimdilik deńgeıin kórsetip otyr. Kapıtal qory - 311 mlrd teńge bolsa, ótimdilik kórsetkishi - 1,2 trln teńge. Kapıtal qory men ótimdilik deńgeıiniń jetkilikti ekenin eskerip, búgingi tańda Jusan Bank-ke memleketten berilgen kómekti birtindep qaıtarý máselesi qarastyrylyp jatyr», - deıdi Álıhan Smaıylov.
Buǵan deıin Jusan Bank-tiń aksıonerlerine 2021 jylǵy jaı aksıalary boıynsha dıvıdend tólenbeıtini belgili bolǵan edi.