Qazaqstan Respýblıkasy Parlament Májilisi men máslıhat depýtattaryn saılaý 19 naýryzǵa bekitildi. Bul saıası úderis kezinde partıalar, jekelegen tulǵalar dodaǵa qatysady. Osy máselege oraı saıası sarapshylar da ún qosýda.
Fılosofıa, saıasattaný jáne dintaný ınstıtýtynda aldaǵy saılaýǵa qatysty jıyn ótti. Sharada «Parlament Májilisi men máslıhattar saılaýynyń saılaý prosesine etno-mádenı birlestikterdiń qatysýyn talqylaý» taqyryby ortaǵa salyndy. İs-sharany alǵysózben osy ınstıtýttyń Bas dırektory Serik Seıdýmanov ashyp berdi. Al moderatorlyqty Shaıkemel Muhtarbek júrgizdi.
Jıynǵa belgili qazaqstandyq ǵalymdar men sarapshylar, etno-mádenı birlestikterdiń ókilderi men Almaty qalasy QHA músheleri, sondaı-aq qoǵam ókilderi men jýrnalıser qatysty.
Belgili ǵalym, fılosofıa ǵylymynyń kandıdaty Aıdar Ámrebaev Qazaqstan halqy Assambleıasynyń jumystary tóńireginde oı qozǵady. Sonymen qosa, onyń qoǵam ómirindegi mańyzdylyǵyna toqtaldy. Aldaǵy ýaqytta mundaı ınstıtýsıonaldyq qurylymnyń qanshalyqty qajettigi jáne ózektiligi jóninde oılarymen bólisti.
– Qazaqstan halqy Assambleıasy óz kezeńinde mańyzdy rólge ıe boldy. Eldiń saıası ómirinde asa belsendilik tanytty. Biraz ıgi jumystarǵa atsalysty. Ol jaǵy anyq. Saıası arenada da qomaqty úlesinen aırylmady. Udaıy qoldaý taýyp júrdi. Eldegi Parlament saılaýy kezinde belsendi jumys kerek. Osy tusta Assambleıa jarqyrap kórinetin shaǵy dep bilemiz. Árqashan «jeńildiń astymen, aýyrdyń ústimen» júrmeı, ashyq belsendi jumys istese degen nıettemiz. Otanymyz barshamyzǵa ystyq, ortaq, qasıetti úı ekenin umytpaıyq, – dedi ǵalym Aıdar Moldashuly.
Parlament saılaýyna oraı QHA músheleri de belsendilik tanytyp júr.
– Elde aýqymdy saıası naýqan bastaldy. Kóptegen ózgerister bolyp ta, jasalyp ta jatyr. Assambleıa belsendi ári shıraq qımyldaý ústinde. Barlyq isten shetkeri qalmady. Syn kóp aıtylýy múmkin. Biraq saılaýda óz tańdaýymyzdy bir kisideı bildiremiz dep oılaımyn, – dedi QHA múshesi Shaıkemel Muhtarbek.