Áleýmettik qyzmet kórsetý ortalyǵynda Qazaqstan Respýblıkasy Sybaılas jemqorlyqqa qarsy is-qımyl agenttigi Qoǵamdyq keńesiniń syrttaı otyrysy ótti.
Aýqymdy basqosýda qalanyń sybaılas jemqorlyq táýekelder kartasyn júzege asyrý, bıznesti qorǵaý jáne sybaılas jemqorlyqqa qarsy zańnamadaǵy jańalyqtar týraly máseleler talqylandy. Oǵan ANTICOR agenttigi janyndaǵy Qoǵamdyq keńestiń basshysy, músheleri, Almaty qalalyq Qoǵamdyq keńesiniń músheleri, belsendiler, kásipkerler quqyǵyn qorǵaýshylar, memlekettik qyzmetshiler, tilshiler qatysty.
Jıynda ár salanyń mamandary jemqorlyq faktileriniń aldyn alý, boldyrmaý, túbegeıli joıý sharalaryn qarastyrdy. Otyrysta jarıalylyq týraly kóp áńgime aıtyldy. Ár salada jobanyń smetalyq qujattary bekitilmeı turyp, quqyqtyq-normatıvtik jaǵyn eskerý qajettigi baıandaldy.
Marat BASHIMOV,
QR Sybaılas jemqorlyqqa qarsy is-qımyl agenttigi janyndaǵy Qoǵamdyq keńes tóraǵasy:
Halyqaralyq tájirıbeni qoldanaıyq
QR Prezıdenti Qasym-Jomart Toqaev sybaılas jemqorlyqty joıýǵa baılanysty birqatar naqty tapsyrma júktedi. Osy baǵyttaǵy jumysymyz aıqyn. Júgensiz ketken jemqorlyq táýekelderin aýyzdyqtaýǵa baǵyttalǵan is-sharalar bastalyp ketti.
Sybaılas jemqorlyqqa qarsy is-qımyl agenttiginiń janyndaǵy Qoǵamdyq keńestiń kóshpeli otyrysy alǵash ret uıymdastyrylyp otyr. Buǵan Almaty qalasyndaǵy áriptesterimiz qoldaý bildirdi. Megapolıstiń respýblıkalyq mańyzy joǵary. Mundaǵy qordalanǵan máselelerdiń sheshimin birlesip tabýdy kózdeımiz.
Memlekettik qurylymnyń ár salasynda jemqorlyqty tejeý qarastyrylýda. Tipti, túp-tamyrymen alyp tastaý qajet. Árbir iste taldaý-saraptamalyq jumystar júrgizilýde. Bul baǵytta kóptegen kúrmeýli suraqtarǵa tap bolýdamyz. Eń negizgisi, kásipkerlikke qyspaq jasaýdy boldyrtpaý. Mundaı júgensizdik beleń ala berse, onyń saldarymen kúres qıyndaıdy. Sondyqtan paraqorlyqqa tyıym salýdyń barlyq formalaryn naqty ispen júzege asyratyn kún týdy. Jemqorlyqty joıý úshin qoldan keler is-qımyldyń bárin jasaý kerek. Bul dertti aýyzdyqtamasaq, ár salaǵa zıanyn tıgizip bitetin túri bar. Qoǵam da, memleket te paraqorlyqtyń joıylýyna múddeli. Bul baǵyttaǵy strategıa qolǵa alǵan isterdi jandandyrady. Ashyq búdjet, ketken olqylyq, qaı jerde ózekti másele týyndady, mine, sony qadaǵalaý kerek. Óńirlerdiń jaǵdaıy alańdatady. Aımaqtardaǵy memlekettik qurylymnyń taza ári sapaly jumys isteýinde kezdesetin birqatar túıtkilderdi sheshý joldaryn saraptaıyq. Munda qarapaıym azamattardyń úni eskerilse deımiz. Bul óte mańyzdy is. Sarapshy, belsendi jáne t.b. mamandardyń pikiri aýadaı qajet.
Qazir bizge «velosıped» oılap tabýdyń qajeti shamaly. Halyqaralyq konvensıaǵa súıensek jetkilikti. Eýropalyq tájirıbe bar. Bir nársege úmittenemiz. Dálirek, azamattyq jaýapkershilik pen qylmystyq jaýapkershilikti saralaı qarastyryp, arajigin naqtylaıyq. Jańadan saılanatyn Parlament osy aıtylǵandarǵa nazar aýdarsa eken. Qajetti zańdy bekitip, el ıgiligine jarataıyq.
Saıan AHMETJANOV,
QR Sybaılas jemqorlyqqa qarsy is-qımyl agenttigi Prevensıa qyzmetiniń basshysy:
Jemqorlyqpen kúres kúsheıedi
Bıznes jemqorlyqqa kóp ushyraıdy. Bul jaǵy belgili. Ókiletti organdardyń qyspaqqa almaý jaǵyn qarastyryp jatyrmyz. «Bızneske jol» degen baǵdarlama bastaldy. Osynyń aıasynda kelip túsken aryz-shaǵym qarastyrylady. Biz kóptegen yńǵaısyz jaǵdaıdan habardarmyz. Búrokratıaǵa jol bermeýimiz kerek. Tipti, onlaın qaraı bastaımyz. Jergilikti atqarýshy organdarmen birlesip is-qımyl jasaımyz.
Aldaǵy ýaqytta atqaratyn is kóp. Júıeli jumystar bar. Jergilikti atqarýshy organdardyń da kómegi zor bolaıyn dep tur. Árbir kelip túsken hat, ótinish, aryz naqty qaralatyn bolady. Barlyǵyna taldaý júrgiziledi. Zań sheńberinde tıisti sharalar jasalady.
Jemqorlyqpen kúreste buqaralyq aqparat quraldarynyń róli zor. Qazirgi ýaqyt talabyn eskeremiz. Jańa tehnologıany qoldanyp, onlaın formatta da is atqara beremiz.