Almatyda quqyq qorǵaý organdary ınternet-alaıaqtyq pen nesıelerdi zańsyz rásimdeý faktilerine qatysy bar qylmystyq toptardy áshkerelep, jalpy shyǵyny 300 mln teńgeden asatyn qylmystardyń jolyn kesti, dep habarlaıdy Aqshamnews.kz tilshisi.
Tergeý derekterine sáıkes, alǵashqy epızodta kúdiktiler ózderin memlekettik organ jáne bank qyzmetkerleri retinde tanystyryp, negizinen qart adamdardy aldap soqqan. Olar azamattardyń páter satýdan túsken qarajatyn jáne bank depozıtterindegi aqshasyn ıemdengen. Aqshany berý faktileri jetkizý qyzmetteriniń kýrerleri arqyly júzege asqan.
Ekinshi jaǵdaı boıynsha áleýmettik osal toptaǵy adamdardyń atyna qaıtarymsyz avtonesıeler rásimdelip, keıin kólikterdi qaıta satyp jibergen uıymdasqan top anyqtalǵan. Keı avtokólikterdiń Qazaqstan aýmaǵynan tys jerge shyǵarylyp, qaıta satylǵany aıtylady. Qarjy uıymdaryna keltirilgen shyǵyn 66 mln teńgeden asqan.
Jedel-izdestirý jáne tergeý sharalary barysynda 10-nan astam kúdikti ustalyp, bir adamǵa izdeý jarıalanǵan. Sondaı-aq ondaǵan tintý júrgizilip, aqsha qarajaty, qarý, uıaly telefondar jáne qujattar tárkilengen.
Almaty qalasynyń prokýratýrasy azamattarǵa eskertý jasap, memlekettik organdar men bankter aqsha talap etpeıtinin, «qylmystyq is» dep qorqytyp nemese qoqan-loqqy kórsetip qońyraý shalmaıtynyn málimdedi. Kúdikti qońyraýlar bolǵan jaǵdaıda dereý quqyq qorǵaý organdaryna habarlasý qajet.