Kúnniń kózi nuryn tógip, aınalań jasyl kilemge oranǵan shaqta aǵashtyń saıasynda demalyp, saıabaq aralap, serýen qurǵanǵa ne jetsin, shirkin?!
Atyn atap, túsin tústemesek te, qazirgi ýaqytta Almatynyń saıabaqtary qala turǵyndarynyń súıikti demalys ornyna aınaldy deýge bolady. Óıtkeni, qalanyń qaı jaǵyna barsańyz da dál osy kórinisti kóresiz.
Jasyl jelek jamylǵan saıaly baqta adam qarasy keshke qaraı kóbeıe túsedi. Bul meken, ásirese, tynyshtyqty jany súıetin, bir mezgil boı sergitip, taza aýamen tynystaǵysy keletinder úshin taptyrmas oryn. Sebebi, mundaǵy qustardyń saıraǵan úni men sýburqaqtan esken salqyn lep janyńdy sergitedi. Saıabaq ishindegi oryndyqtarǵa jaıǵasqan jastar da, áńgime-dúken quryp otyrǵan qarıalar da jap-jasyl baqtyń jaılylyǵyn bildiredi. Al kishkentaı balǵyndardyń oıynshyq kólikterimen yzǵytyp júrgeni, olardyń alańsyz kúlkisi saıabaq sánin eseleı túsken...
Almatyda barlyǵy 211 saıabaq aýmaǵy bar. Aýdany 631,2 ga quraıtyn jasyl aımaqtyń ishinde 12-si saıabaq, 124-i skver, 21-i býlvar, 10 jaǵalaý, 13 jasyl aımaq, 31-i jaıaý júrginshi aımaǵyna jatady.
Almaty qalasy Ekologıa jáne qorshaǵan orta basqarmasy mamandarynyń aıtýynsha, boı kótergen saıabaqtar aýdandardyń balansyna beriledi, ıaǵnı jaýapkershilik saıabaq ornalasqan aýdan ákimdikteriniń quzyrynda bolady. Halyqtyń jaıly demalysyn qamtamasyz etý maqsatynda ótken jyly qalada ornalasqan jalpy aýmaǵy 87,9 ga quraıtyn 10 saıabaqqa qurylys-jóndeý jumystaryn júrgizdi. Solardyń qatarynda sáýleti men tarıhı kelbetin saqtaı otyryp, Memlekettik Murajaı men Oqýshylar saraıynyń janyndaǵy tynymbaqtar, Álıa – Mánshúk, Aeroport dańqy, Qazaq–Brıtan ýnıversıteti tynymbaqtary, Baıseıitova kóshesinde ornalasqan tynymbaqtar qaıta jańǵyrtýdan ótti. Nátıjesinde serýen quratyn aımaqtary, balalar oıyny men sport alańdary bar, jasyl aýmaqtar el ıgiligine usynyldy.
Bul úrdis bıyl da jalǵasyn taýyp, Alataý, Naýryzbaı, Túrksib, Medeý men Bostandyq aýdandaryn qamtıtyn jasyl aımaqtar qatary kóbeıe túspek.
Saıabaqtardy aralap júrip, turǵyndarmen de tildestik.
– Jazdyń aptap ystyǵynda janǵa saıa. Jerge shanshylǵan aǵashtar etek jaıyp jaıqalyp turǵan soń tynysyń ashylady. Bizdi tanystyrǵan da, tabystyrǵan da osy saıabaq. Joldasymyz ekeýmiz osynda tanysqanbyz. Sondyqtan bolar, otbasymyzben osy saıabaqta kóp serýendeımiz. Jastyǵymyzǵa kýá bolǵan bul mekenniń búgingi kórki kóz toıarlyq. Barlyq jaǵdaı jasalǵan. Almaty osyndaı jasyl jelegimen de erekshe ǵoı, – deıdi balalarymen serýendep júrgen Symbat esimdi kelinshek.
Iá, qalaı desek te, saıabaqtar qalanyń sáni ekeni ras. Sondyqtan siz ben bizge jaılylyq syılaıtyn osyndaı demalys oryndaryn kútip ustaý, ol jerdiń tazalyǵyn saqtaý tek jaýapty mekemelerge ǵana emes, sonymen qatar turǵyndarǵa da júktelgen jaýapty is ekenin umytpasaq bolǵany.