Almatylyqtardyń qala meshitterine beretin sadaqasynda áleýmettik osal toptar men muqtaj otbasylardyń nesibesi bar.
«Almaty Ortalyq meshitinde 600-den astam kómekke muqtaj otbasy tirkelgen. Olar árdaıym Ortalyq meshitten kómek alyp turady. Qaladaǵy 52 meshittiń árbirinde osyndaı muqtaj otbasylar tirkelgen. Olarǵa kómek kórsetý halyqtyń meshitke bergen qarajatynan júzege asyrylady», – deıdi Almaty qalasy bas ımamynyń birinshi orynbasary Erjan Esim.
Sondaı-aq, onyń aıtýynsha, bıyl pitir sadaqasyn unmen, qarajatpen jáne ramadan2022.kz saıtyndaǵy arnaıy «pitir sadaqa berý» batyrmasy arqyly berýge de bolady. Almaty Ortalyq meshitiniń ustazy Rýslan Qaıyrgeldi qaladaǵy 52 meshittiń 47-sinde bıyl taraýıh namazdary oqylyp, Quran hatym túsiriletinin aıtty.
«Qala meshitterinde túski jáne keshki namazdardan keıin dáris, sabaqtar ótkiziledi. Ol jerden siz ózińizdi tolǵandyrǵan suraqtaryńyzǵa jaýap ala alasyz», – dedi R.Qaıyrgeldi. Sadaqany meshitke barmaı-aq, úıde otyryp ta onlaın berýge bolady. Iaǵnı Kaspıı banktiń qosymshasyndaǵy «Tólemder» degen jerde Almatydaǵy barlyq meshit tirkelgen. Sol jerden «Sadaqa» degen bólimdi basa otyryp, qalaǵan somańyzdy jiberýge múmkindik bar. Dinimizde «Sadaqa adamdy jamandyqtan, bále-jaladan saqtaıdy» deıdi.