Ekonomıkanyń sapaly jáne ornyqty damýyn qamtamasyz etedi.
Úkimet otyrysynda respýblıkalyq búdjetti jáne Ulttyq qordan kepildendirilgen transfertti naqtylaý týraly zań jobalary maquldandy, dep habarlaıdy Almaty-akshamy.kz QazAqparatqa silteme jasap.
«Búgin álemdik saıası-ekonomıkalyq jaǵdaıdy eskere otyryp, osy jylǵa arnalǵan makroekonomıkalyq kórsetkishterdiń naqtylanǵan boljamyn qaradyq. Memleket óziniń áleýmettik mindettemelerin tolyq kólemde jáne ýaqytyly oryndaıdy. Sondaı-aq qazirgi jaǵdaıda ekonomıkanyń sapaly jáne ornyqty damýyn qamtamasyz etedi. Respýblıkalyq búdjet jobasy birinshi kezekte osyǵan baǵyttalyp otyr. Búdjet teńgerimdiligin qamtamasyz etý úshin Ulttyq qordan túsetin kepildendirilgen transfert mólsherine túzetý engiziletin bolady», - dedi Premer-Mınıstr Álıhan Smaıylov.
Onyń atap ótýinshe, qosymsha shyǵystar Memleket basshysy Qasym-Jomart Toqaevtyń qańtar aıyndaǵy, sondaı-aq Úkimettiń keńeıtilgen otyrysynda jáne Qazaqstan halqyna Joldaýynda bergen tapsyrmalaryn iske asyrýǵa jumsalady. Sonymen birge osyǵan deıin qabyldanǵan shuǵyl mindettemelerdi oryndaýǵa baǵyttalady.
«Qarajatty qańtar oqıǵasynan keıin memlekettik múlik pen qalalardyń ınfraqurylymyn qalpyna keltirýge, qarjy-ekonomıkalyq turaqtylyqty qamtamasyz etýge jáne halyqty, bıznes pen ekonomıkanyń naqty sektoryn qoldaýǵa jumsaý josparlanýda», - dedi Álıhan Smaıylov.
Osydan keıin Úkimet músheleri Naqtylanǵan áleýmettik-ekonomıkalyq damý boljamy men bıylǵy jylǵy respýblıkalyq búdjetti naqtylaý boıynsha tásilderdi maquldady. Bıylǵy jylǵy respýblıkalyq búdjetti naqtylaý týraly jáne Ulttyq qordan kepildendirilgen transfertti naqtylaý týraly zań jobalaryna qoldap daýys berdi.
«Ulttyq ekonomıka jáne Qarjy mınıstrlikteri Premer-Mınıstr Keńsesimen birlesip, zań jobasy men Áleýmettik-ekonomıkalyq damý boljamyn Parlamentke engizýdi qamtamasyz etsin», - dedi Álıhan Smaıylov.