Halyqtyń tabysyn arttyrýǵa 197 mlrd teńge jumsalady. Bul týraly búgin Úkimet otyrysynda QR Premer-Mınıstriniń orynbasary - Qarjy mınıstri Erulan Jamaýbaev aıtty, dep habarlaıdy Almaty-akshamy.kz QazAqparatqa silteme jasap.
Onyń atap ótýinshe, 2022 jylǵa arnalǵan respýblıkalyq búdjetti naqtylaý týraly zań jobasynda halyqtyń tabysyn arttyrýǵa baǵyttalǵan jalpy shyǵystar 197 mlrd teńgeni quraıdy. Osy qarajat aıasynda jastardy qoldaý, óz bıznesin ashý úshin mıkrokredıtter berý, jalǵa alynǵan turǵyn úı úshin tólemniń bir bóligin sýbsıdıalaý jáne halyqtyń naqty tabysyn arttyrýǵa baǵyttalǵan basqa da mańyzdy is-sharalar qamtamasyz etiledi. Al azyq-túlik qaýipsizdigin qamtamasyz etý jospary aıasyndaǵy is-sharalarǵa 238 mlrd teńge jumsalady.
«Qosymsha qarajat agroónerkásiptik keshendi sýbsıdıalaýǵa, kóktemgi egis jáne egin jınaý jumystaryna jeńildikpen kredıt berý kólemin ulǵaıtýǵa jáne aýyl sharýashylyǵyndaǵy basqa da máselelerdi sheshýge baǵyttalatyn bolady», - dedi Erulan Jamaýbaev.
Sonymen qatar, onyń aıtýynsha, jalpy somasy 476 mlrd teńge bolatyn qosymsha shyǵystar óńirlerdi damytýǵa bólinedi.
«Atalǵan shyǵystardyń 271 mlrd teńgesi nemese 57 paıyzy batys jáne ońtústik óńirlerdi damytýǵa baǵyttalǵan. Jalpy alǵanda, naqtylaýdy eskere otyryp, óńirlerge respýblıkalyq búdjetten 5,5 trln teńgeden astam qarajat nemese jalpy shyǵystardyń 29,3 paıyzy baǵyttalatyn bolady. Sondaı-aq, qosymsha qarajat aıasynda ınflásıa dáliziniń ózgerýine baılanysty áleýmettik tólemderdi ındeksteýge arnalǵan shyǵystar kózdelgen. Bul 110 mlrd teńgeden asady», - dedi Erulan Jamaýbaev.
Mınıstrdiń aıtýynsha, osylaısha búdjet túsimderi 15,8 trln teńgeni nemese jalpy ishki ónimge 17,3 paıyzdy quraıdy. Shyǵystar 18,8 trln teńge nemese jalpy ishki ónimge 20,5 paıyz deńgeıinde boljanyp otyr.
«Búdjet tapshylyǵy buryn bekitilgen deńgeıde saqtaldy. Barlyq josparlanǵan sharalar ekonomıka men óńirlerdiń damýyna serpin beredi, halyq tabysynyń ósýin qamtamasyz etýi jáne azamattardyń ómir súrý sapasyn jaqsartýy tıis», - dedi ol.