Qazaqstannyń birinshi, álemniń 4-raketkasy Elena Rybakına Sınsınnatı (AQSH) WTA 1000 týrnıriniń úshinshi aınalymyna shyǵa almady.
Jarysty ekinshi aınalymnan bastaǵan qazaqstandyq tenısshi álemniń 27-raketkasy, kanadalyq, 2021 jylǵy AQSH ashyq chempıonatynyń fınalısi Leıla Fernandespen kezdesti, dep habarlaıdy aqshamnews.kz.
Bul E.Rybakınanyń densaýlyǵyna baılanysty Parıj Olımpıadasynda qatysýdan bas tartqannan keıingi alǵashqy oıyny edi.
Mach breık almasýmen bastaldy. Esep 4:3 bolǵan mezette breık jasaǵan Rybakına sol basymdylyǵynan aıyrylǵan joq – 6:3.
Ekinshi sette taı-breıkte Fernandes sátti óner kórsetti – 7:6 (7:3).
Úshinshi, sheshýshi partıada esep 3:3 bolǵan mezette Fernandes breık jasap ketti. Aqyry machty jeńispen túıindedi – 6:4.
Eki saǵat 35 mınýtqa sozylǵan tartysty báseke barysynda Rybakına 20 eıs jasap, 7 breık-poınttyń altaýyn paıdalandy. Kanadalyq sportshy 5 eıs, 6 breıkpen (17 breık-poınt) kózge tústi.
L.Fernandes shırek fınalǵa shyǵý úshin álemniń 20-raketkasy, reseılik Dıana Shnaıdermen talasady.
E.Rybakına ótken jyly da Sınsınnatıda úshinshi aınalymnan asa almaǵan edi.