Qazaqstan Respýblıkasy Kólik vıse-mınıstri Talǵat Lastaevtyń Rýmynıanyń Qazaqstan Respýblıkasyndaǵy Tótenshe jáne Ókiletti Elshisi Madalına Lýpýmen kezdesýi ótti.
Kezdesýde kólik, logıstıka jáne avıasıa salasyndaǵy ekijaqty yntymaqtastyq máseleleri, sondaı-aq Kólik mınıstri Marat Qarabaevtyń Rýmynıaǵa aldaǵy sapary talqylandy.
Qazaqstandyq tarap aldaǵy sapar aıasynda Rýmynıamen Transkaspıı halyqaralyq kólik baǵyty aıasynda yntymaqtastyqty damytý jónindegi ózara túsinistik týraly memorandýmǵa qol qoıý máselesi pysyqtalyp jatqanyn atap ótti, dep habarlaıdy Almaty-akshamy.kz Kólik mınıstrligine silteme jasap.
Sonymen birge, Vıse-mınıstr Rýmynıanyń THKB aıasyndaǵy róliniń mańyzdylyǵyn, sondaı-aq eki el kompanıalarynyń belsendi qatysýyn jáne júk tasymaldaýshylar arasyndaǵy jaqsy jolǵa qoıylǵan baılanystary týraly jetkizdi.
Atap aıtqanda, taraptar Eýropamen kólik baılanysyn jaqsartý maqsatynda ózara yntymaqtastyq pen THKB damytý máselelerin talqylady.
Sondaı-aq, qazaqstandyq tarap 2024 jyldyń birinshi jartyjyldyǵynda Rýmynıada Halyqaralyq avtomobıl tasymaldary boıynsha Birlesken komısıanyń birinshi otyrysyn ótkizýdi usyndy.
Elshi qabyldaý úshin alǵys aıtyp, eki eldiń THKB aıasyndaǵy yntymaqtastyǵy Qazaqstan men Rýmynıa arasyndaǵy ózara tıimdi qarym-qatynastardyń kilti bolyp tabylatynyn atap ótti.
Kezdesý sońynda taraptar kólik salasyndaǵy odan ári jemisti yntymaqtastyqqa senim bildirdi jáne ótken iskerlik áńgime úshin alǵys aıtty.