Germanıada júk jáne jolaýshylar poıyzdarynyń júrgizýshileri úsh kúndik narazylyq aksıasyn bastap, bul búkil el boıynsha temirjol qatynasynda úzilisterge ákeldi. Sonymen birge nemis fermerleri sýbsıdıalardyń josparly qysqartylýyna narazylyq bildirip, joldardy jaýyp jatyr6 dep habarlaıdy almaty-akshamy.kz VVS-ge silteme jasap.
Deutsche Bahn (DB) ulttyq temirjol operatorynyń málimetinshe, uzaq saparǵa shyǵatyn poıyzdardyń shamamen 80%-y toqtatyldy. Shekteýler aımaqtyq tasymaldaýǵa da áser etedi.
Mashınıster kásipodaǵy jalaqyny kóterýdi, sondaı-aq poıyz mashınısteriniń jumys ýaqytyn aptasyna 38 saǵattan 35 saǵatqa deıin qysqartýdy talap etip otyr.
Deutsche Bahn bul talaptardy qanaǵattandyra almaıtynyn aıtty.
Mashınısterdiń narazylyǵynan mıllıondaǵan jolaýshylar josparlarynan bas tartýǵa nemese dittegen jerine jetýdiń basqa joldaryn izdeýge májbúr boldy.
Ereýil 10 qańtarda bastalyp, juma, 12 qańtarda aıaqtalýy tıis. Osy ýaqytqa deıin Germanıada poıyzdar ýaqytsha apattyq kestemen júredi.
Fermerlerdiń ereýili
Nemis fermerleriniń narazylyq sherýi ótken jyldyń jeltoqsanynan jalǵasyp jatyr. Dúısenbiden bastap fermerler keıbir tasjoldar kireberisterin traktorlarymen jaýyp, qalalar men eldi mekenderde mıtıń ótkizýde. Narazylyq sharalary kólik qozǵalysyn qıyndatqan.
Fermerler ótken jyldyń sońynda búdjet tapshylyǵyn qysqartýǵa baǵyttalǵan birneshe qatań sharalar engizgen Germanıa úkimetimen apta boıy kelissózder júrgizdi.
Sonymen qatar bılik dızeldik otynǵa dotasıany alyp tastaýdy jáne aýyl jáne orman sharýashylyǵynda qoldanylatyn tehnıkany kólik salyǵynan bosatpaýdy kózdedi.
Sharýalardyń jappaı narazylyǵynan keıin úkimet búdjetti únemdeý sharalaryn jumsartýǵa kelisti. Atap aıtqanda, dotasıany kezeń-kezeńimen alyp tastaý týraly sheshim qabyldap, tehnıkaǵa salyq jeńildikterin qaldyrdy.
Degenmen bul sharalar fermerlerdi tynyshtandyrýǵa kómektesken joq. Olar úkimetten sýbsıdıany qysqartýdan tolyǵymen bas tartýdy talap etip otyr.