Memleket basshysy Qasym-Jomart Kemeluly Toqaevtyń Qazaqstan halqyna arnaǵan «Halyq birligi jáne júıeli reformalar – el órkendeýiniń berik negizi» atty Joldaýy ustazdar qaýymynyń kóptegen máselelerine jaýap ispetti boldy.
Bıylǵy el Prezıdentiniń Joldaýynda bilim berý salasyn jan-jaqty damytý qamtylyp otyr.
Joldaýdyń úshinshi baǵyty bilim berý salasyna arnalyp, muǵalimderdi qoldaý saıasaty áli jalǵasa beretindigi aıtyldy. Budan bylaı muǵalimderdi qaıta daıarlaý 5 jyl saıyn emes, 3 jylda bir ret ótip otyratyn boldy. Óıtkeni, muǵalimder oqýshylarǵa jańasha bilim sińire alatyn naǵyz aǵartýshy bolýǵa tıis. Ǵylymǵa yntasy bar oqýshylar men olardyń jetekshilerin materıaldyq yntalandyrý máselesi de kóterildi. Aldaǵy ýaqytta halyqaralyq olımpıadalarda júldeli oryn alǵan talantty oqýshylarǵa 4,5 mln. teńge kóleminde aqshalaı marapat berilse, olardyń ustazdary da materıaldyq turǵydan yntalandyrylatyn boldy. Jeńimpaz oqýshylarǵa joǵary oqý ornyna túsýi úshin konkýrstan tys granttar beriletin boldy.
Prezıdenttiń qala men aýyl arasyndaǵy bilim berý salasyndaǵy alshaqtyqty qysqartý qajettigi de ózekti másele bolatyn. Munyń ózi bilim alýǵa jasalyp jatqan qoldaýdy kórsetedi. Elimizde mektep tapshylyǵy áli de ózektiligin joıǵan joq. Endi bul másele sheshiletin syńaıly. Elimizde 2025 jylǵa deıin 800 mektep salý kózdelse, Prezıdent onyń sanyn myńǵa deıin jetkizýge mindettedi.
Bilim salasyn tolyq qamtyǵan bul Joldaýdy №108 mektep ujymy da jan-jaqty talqylap, bilim júıesindegi ótkir máselelerdiń sheshimin tabatynyna senim bildirip otyr.