Almatyǵa gastróldik saparmen at basyn burǵan «Qazaqkonsert» uıymyna qarasty «Astana Musical» memlekettik teatry Roza Baǵlanovanyń 100 jyldyǵyna oraı «Roza Baǵlanova» múzıklin usyndy.
Múzıkl qalyń kórermenge halyqtyń súıikti ánshisiniń ishki jan-dúnıesi men onyń qaıtalanbas óner álemin pash etti.
«Roza Baǵlanova» múzıkliniń rejıseri ári teatrdyń kórkemdik jetekshisi Eslám Nurtazın málimdegendeı, jańa týyndy ánshiniń balalyq shaǵynan bastap, soǵys jyldaryndaǵy taǵdyry týraly syr shertedi. «Múzıklde Roza Baǵlanovanyń án álemine kelýi, soǵys jyldaryndaǵy qaısarlyǵy, óner jolyndaǵy qıyndyqtary men taǵdyryndaǵy syn saǵattar kórinis tapqan. Oqıǵa jelisi ánshiniń 1930–1945 jyldar aralyǵyndaǵy ómirin sýretteıdi. Sahnada Roza Baǵlanova oryndaǵan ataqty týyndylar, arnaıy jazylǵan avtorlyq týyndylar shyrqaldy», – deıdi rejıser.
Jalpy, qoıylym barysynda sahnada 60-tan astam ártis óner kórsetti. Árqaısysy sol jyldardaǵy halyqtyń, eńbek adamdarynyń, jaýyngerlerdiń beınesin sheber somdady. Ánderin de shyrqap salyp, halyqtyń ásem ánmen kóńilderin terbedi. Basty róldi somdaǵan ártistiń biri – Zarına Jakenova Roza Baǵlanovanyń obrazyn somdaý úshin barynsha izdengenin jetkizdi.
«Roza Tájibaıqyzy – ulttyń úni atanǵan ataqty ánshi. Onyń obrazyn somdaý – bul úlken jaýapkershilik. Ol kisiniń tulǵalyq qasıetterin, soǵys jyldaryndaǵy qaısarlyǵyn, án aıtýdaǵy ózindik qaıtalanbas erekshelikterin qalyń kópshilik óte jaqsy biledi. Búgingi qoıylymda ánshiniń ómirbaıanyndaǵy osy tustaryn biz jańa qyrynan ashýǵa tyrystyq», – deıdi aktrısa.
Jańa múzıkl kórermenderge umytylmas áser syılap, olardyń zor yqylasyna bólendi. Qoıylymdy tamashalaýǵa kelgen belgili teatr qaıratkerleri, ónertanýshylar men zıaly qaýym ókilderi jańa týyndyny joǵary baǵalady.
«Kópten beri osy qoıylymdy kórýdi armandap júrgen edim. Qurbylarymnan spektákl jaıly jaǵymdy pikir estidim. Keldim, kórdim, qýanyp qaıttym. Jastarymyz sondaı talantty. Ár ándi óz júregimen oryndap, bizge usynyp jatyr. Arasynda ózim de qosylyp shyrqap ketemin. Qalamyzda osyndaı mádenı sharalar kóptep ótkizilip jatqany kóńil qýantady», – deıdi kórermen Jadyra Asylbekqyzy.
Eske salsaq, Memleket basshysy uly ánshiniń esimin halyq jadynda máńgi saqtaý sharalaryn qabyldaýdy tapsyryp, byltyr soǵan sáıkes «Qazaqkonsert» memlekettik konserttik uıymyna» Roza Baǵlanovanyń esimi berilgen edi. Bıyl ánshiniń mereıtoıy IýNESKO kóleminde atalyp ótilýde.
