Qazir alańdaýǵa negiz joq
17 aqpanda ótken parlamenttik tyńdaýda Premer-Mınıstrdiń birinshi orynbasary Roman Sklár Almatydaǵy seısmıkalyq qaýipsizdik máselesine qatysty pikir bildirdi, dep habarlaıdy Zakon.kz.
Máseleni Senat depýtaty Sergeı Ershov kóterdi. Túrkıadaǵy joıqyn jer silkinisine toqtalyp, bizde de seısmıkalyq qaýipti Almaty sıaqty óńir bar ekenin aıtty. Osy oraıda ol Roman Sklárdan Almatydaǵy seısmıkalyq qaýipsizdik jaǵdaıyn qalaı baǵalaıtynyn jáne Túrkıadaǵydaı qaıǵyly oqıǵa elimizde qaıtalanbaýy úshin qandaı sharalar qabyldanyp jatqanyn surady.
"Almatyda bir ǵana ınstıtýt bar. Ol - Qazaqstan qurylys jáne sáýlet ǵylymı-zertteý ınstıtýty. Mekeme seısmıkalyq aımaqtaǵy ǵımarattardy jobalaý máselesimen tarıhı túrde aınalysyp keledi. Qazir alańdaýǵa negiz joq dep esepteımin. Tıisti sheneýnikter tıisti qujattarǵa qol qoıa otyryp, osymen aınalysady jáne óz jumysyna jaýap beredi", - dedi Roman Sklár.
6 aqpan kúni tańerteń Túrkıa men Sırıada kúshti jer silkinisi boldy. Terbelis magnıtýdasy 7,8 bal boldy. Alǵashqy jer silkinisinen keıin turǵyndar kem degende taǵy on shaqty jer silkinisin sezindi.