«Astana Balet» teatry almatylyqtarǵa mán-maǵynasy tereń, aıshyqty baǵdarlama usynbaq, dep habarlaıdy aqshamnews.kz
Astanalyq teatr almatylyqtarǵa rok-balettegi tango mánerindegi «Jyl maýsymy» deıtin úlken baǵdarlama usynǵaly otyr. Onda klasıka da, ultyq horeografıa da, qazirgi balet pen sımfonıalyq mýzyka da bar. Almatynyń óńirlik komýnıkasıalar ortalyǵynda ótken konferensıada osy konserttiń jaı-japsary aıtyldy.
«Almatyǵa gastróldiń saparmen keletin «Astana balet» teatrynyń qoıylymy mamyr aıynyń 10-18 aralyǵynda «Almaty Theatre sahnasynda ótedi. Bul qaladaǵy úlken mádenı jańalyq bolǵaly tur. Baǵdarlamada – premeralar, áıgili qoıylymdar, álemge tanymal óner juldyzy Erjan Qulybaevtyń ózi qatysatyn sımfonıalyq mýzyka keshi men qazaq mádenıeti týraly eldi eleń etkizer spektákl da qoıylmaq.
«Almaty – bizdiń jolymyz túsetin eń birinshi qala. Biz súıikti qalamyzǵa jyl saıyn kelip turamyz. Odan keıin Tarazda, Aqtóbede, Taldyqorǵan, Pavlodar men Túrkistanda boldyq. Shetelge de shyǵyp turamyz. Sońǵy jyldary Jenevada, Tbılısıde, Afına men Antalıada da óner kórsete bastadyq. Sonymen birge, bizdiń top kishigirim qurammen Parıjde, Delı men Mýmbaıda da óner kórsetip qaıtty», - dep qosty, Valerıı Kýzembaev.
Gastróldik sapar mamyr aıynyń 10-11 kúni ónerdi modernmen, teatr dramatızmimen ushtastyrǵan Kırıl Radeevtiń horeografıasyndaǵy «Blind Forgiveness» deıtin qoıylymymen ashylady. Arsenıı Smırnovtyń mýzykasynyń demeýimen, onda jan-dúnıeńdegi arpalyspen kúresý, keshire bilý sıaqty ǵıbartty áńgime aıtylmaq.
«Bizdiń teatrdyń erekshe shyǵarmashylyq statýsy bar. Biz ózimizdi eshqandaı akademıalyq ramkamen shektep tastaǵan joqpyz. Repertýarymyzda ártúrli shyǵarma bar. Biz qazirgi zamanǵy bolsyn, modern, ulttyq naqyshtaǵy qoıylym bolsyn, bárin ala beremiz. Sońǵy jyldary qazirgi horeografıanyń shedevri sanalatyn talaı dúnıeni sahnalap úlgerdik. Keshe, arǵy kúnderi ótken qazirgi rok-balet «Blind Forgiveness»-ti Almatyǵa ákelgenimiz de sodan. Almatylyqtar óte jaqsy qabyldady ony», - dedi, Valerıı Kýzembaev.
Mamyrdyń 13 kúni kórermender – qazirgi zamannyń eń áıgili skrıpka sheberleriniń biri Erjan Qulybaevtyń sımfonıalyq orkestrimen qaýyshady. «Jyl maýsymyndaǵy» Antonıo Vıaldıdyń klasıkasy men argentınalyq maestro Astor Pássollanyń sıklyn oryndaıdy onda. Erjan Qulybaev zamandastaryna aty máshhúr solıs, Washington Award premıasynyń laýreaty, halyqaralyq baıqaýlardyń jeńimpazy, álemniń eń úzdik sahnalarynda óner kórsetip, elimizdiń atyn shyǵaryp júrgen jerlesimiz.
«Almatyǵa gastróldik saparmen barý – úlken jaýaptylyqty talap etedi. Almatylyq kórermenniń talǵamy qandaı ekenin bilemiz. Sondyqtan osynda kelerde, biz baǵdarlamany qyzyqty etip daıarlaýǵa tyrysamyz. Erjan Qulybaev qatysatyn sımfonıalyq orkestrdiń baǵdarlamasyna kelsek, Erjan búkil álem biletin daryndy skrıpka sheberi. Ol óte qyzyqty baǵdarlama alyp keldi osy joly. Onda Pássollanyń da, Vıvaldıdyń da mýzykasy bar. Kórermen jalyqpas dep oılaımyn», - dedi, «Astana Balet» teatrynyń kórkemdik jetekshisi Nurlan Qanetov.
Mamyr aıynyń 15-16 aralyǵynda, teatr Iýrıa Grıgorovıchtiń horeografıasyndaǵy «Mahabbat týraly ańyz» deıtin atyshýly qoıylymyn usynbaq. Sharpysqan sezim men tereń oıdan turatyn bul spektákl balet ónerin jańa satyǵa kótergen. Nazym Hıkmettiń pálsapalyq pesasyn negizgi alǵan spektákldyń mýzykasyn Arıf Melıkov jazyp, vızýaldyq estetıka jaǵyn Sımon Vırsaladze óńdep shyǵypty.
Horeogorafıa ónerimen qazaq mádenıetin nasıhattap júrgen Qazaqstannyń óner qaıratkeri Aıgúl Tátıdiń «Uly Dalanyń murasy» degen qoıylymy mamyrdyń 18 kúni osy gastróldik sapardyń sońǵy núktesin qoıady. Etnografıalyq obrazdar, qazaqtyń biregeı mádenıeti men balet óneriniń erekshe qoltańbasy ushtasqan osy spektákl «Astana balet» teatrynyń eń úzdik ónimi sanalady.
Qazaqstan respýblıkasynyń Mádenıet jáne Aqparat mınıstrliginiń qoldaýymen ótetin bul gastról ónerdi qadir tutatyndarǵa, ultymyzdyń balet ónerin baǵalaıtyndarǵa tosyn syı bolmaq.