Áleýmettik jelide Almaty kósheleriniń birinen bastap, Qumbel shyńyna deıin toqtaýsyz júgirgen jigittiń beınesin kórgen bolarsyz. Jurt onyń áreketine tańǵalyp, túrli pikir jazyp jatyr. Aqshamnews.kz tilshisi júgirýdi ómirlik hobıine aınaldyrǵan Arsan Álimhan esimdi azamatty taýyp áńgimelesti.
"Ókpeń óshkenshe júgir". Arsandy ne shabyttandyrady?
Arsan Álimhan - Qonaev qalasynyń týmasy. Jelide óziniń hobbıin erekshe formatta bólisip otyratyn 24 jastaǵy jigit, úzdiksiz júgirý arqyly neni kózdeıtinin aıtty.
"Júgirý, taýǵa shyǵý, ýaqytymda taza aýada ótkizý - meniń súıikti isim. Arnaıy osylaı júgirý úshin eshqashan jattyqqan emespin. Tipti marafondarǵa da qyzyqpaımyn. Keıingi úsh aıda jelide osyndaı kontent bastadym. Onda maǵan pikirlir bólimindegi adamdar "ókpeń óshkenshe júgir", "sary tús kórgenshe júgir", "taý shyńyna deıin júgir" degen syndy tapsyrmalar beredi. Meni sol dittegen núkteme jetken kezdegi sezim shabyttandyrady", - deıdi ol.
5 saǵat 30 mınýt: taýǵa deıin toqtaýsyz júgirý qanshalyq qıynǵa soqty?
Arsannyń jelige júktegen keıingi marshrýty jurtty tańdaı qaqtyrmaı qoımady. Onyń Nazarbaev-Rozybakıev kósheleriniń qıylysynan bastap, Qumbel shyńyna deıin shamamen 40 shaqyrym joldy toqtamaı júgirip jetken vıdeosy jelide 4 mılıonnan astam qaralym jınaǵan. Arsan tolyǵyraq bylaısha baıandady:
"Qaladan bastalǵan saparym shamamen 30-40 shaqyrymǵa sozyldy. Qumbel shyńyna 5 saǵat 30 mınýtta jettim. Óte qatty sharshadym. Ońaı bolmady. Sebebi jol jazyq emes, órge qaraı boldy. Bul eki ese kúsh túsiredi. Dese de, joǵaryda aıtqanymdaı kózdegen jerime jetpeı qoımaıtyn janmyn" ,- dep qosty ol.
"Taýda qonǵanymda bastyrylyp qaldym"
Bul marshrýt Arsan úshin úırenshikti jaıtqa aınalǵan. Onyń 50 shaqyrymnan asatyn saparlary da bolǵan.
"Eń uzyny shamamen 40–50 shaqyrym boldy. Ol - ÝAK-qa baratyn joldan Týrıs shyńyna deıin, ári qaraı Terra alańyna qaraı tómen túsetin baǵyt. Jalpy taýǵa shyǵý kezinde neshe túrli jaǵdaılar boldy. Birde qysta Kók Jaılaýda shatyrsyz, tek uıyqtaıtyn qaptyń ishinde túnegen kezimde bastyrylyp qalǵan edim. Sol sát men úshin óte qatty úreıli boldy" ,- dep eske aldy Arsan.
"Tabıǵattyń ǵajaıybyn tanytyp, erkindikti sezindirgim keledi"
"Taý balasyna" aınalǵan Arsan tabıǵattyń túrli ǵajap núktelerinen kontent túsirgendi jany súıedi. Ol osy isi arqyly jastardy belsendi ómirge qyzyqtyrǵysy keletinin jetkizdi.
"Osyndaı uzaq saparalardy tolyq vıdeomen berýdi batys kontentteriniń birinen baıqap, ózim de qaıtalap kórdim. Adamdarǵa óte qyzyq eken. Olardy tańǵaldyrý maǵan da shabyt syılady. Ár saparymdy erekshe beınejazbalarǵa aınaldyryp, ózim sekildi jastardy tabıǵattyń sulýlyǵyn kórýge, erkindikti sezinýge shaqyrǵym keledi. Rasynda álem ǵajaıypqa toly. Tek ony kórý kerek, seziný kerek", - dep túıindedi Arsan.
Aıta keteıik, Arsan qazir óziniń nemen aınalysatynyn jasyryp qalýdy surady. Onyń aıtýynsha, adam nemen aınalyssa da, óz isin súıikti baǵytymen ushtastyrýǵa tıis.