Almatydaǵy búkil qonaqúı úshin "Real Madrıd" qansha tóledi?
Buǵan deıin belgili bolǵandaı, ÝEFA Chempıondar Lıgasy aıasyndaǵy mach úshin Almatyǵa kelgen "Real Madrıd" komandasy InterContinental qonaqúıine ornalasty. Olar kelisimen qonaqúıdiń basqalar úshin jabylǵany týraly qaýeset taraı bastady, - dep habarlaıdy Aqshamnews.kz.
Mundaı qaýesetterge sebep bolǵan jaıttar – qonaqúıdiń qorshalýy, ishke komandaǵa qatysy joq adamdardyń kirgizilmeýi, sondaı-aq 29 qyrkúıek keshinde ǵımarattyń terezeleri túgeldeı qarańǵy bolýy: sol kezde qonaqúı jumys istemeı turǵandaı áser qaldyrǵan.
Bul aqparatty SHOT Telegram-arnasy rastady: "Real Madrıd" komandasy óz tynyshtyǵyn qamtamasyz etý úshin InterContinental qonaqúıin 28 qyrkúıekten 1 qazanǵa deıin tolyqtaı jalǵa alǵan. Bul úshin komanda 278 mıllıon teńgeden astam (507 myń AQSH dollarynan kóp) qarajat jumsaǵan.
Basylym málimetinshe, 28 qyrkúıek pen 1 qazan aralyǵynda standartty nómirdiń ortasha baǵasy – táýligine 375 dollar, al lúks nómir – 560 dollar bolǵan. Qonaqúıde barlyǵy 277 bólme bar, jáne olardyń barlyǵy mach aıaqtalǵansha "Realǵa" tıesili. Komanda 40-tan astam adammen kelgen.
Osy kúnderi fýtbol men "Real" jankúıerleri qonaqúı mańyn torýyldap, juldyzdy fýtbolshylardy kórýge tyrysty. Al 29 qyrkúıek túni Almaty áýejaıyna júzdegen jankúıer "Qaırattyń" qarsylastaryn qarsy alý úshin jınaldy.
26–29 qyrkúıek aralyǵynda Almatyǵa "Qaırat" – "Real Madrıd" machyn kórýge Qytaı, Úndistan, Reseı, Japonıa, Ulybrıtanıa, Ispanıa, Chehıa, TMD elderi men basqa da Eýropa memleketterinen 5 myńnan astam sheteldik qonaq kelgen.