Parlament Májilisiniń depýtaty Rınat Zaıytov áleýmettik jelidegi parashasynda ózine jasalyp jatqan shabýyl jaıly jazba qaldyrdy, dep habarlaıdy Almaty-akshamy.kz.
Depýtattyń aıtýynsha, mundaı qysymdar oǵan buǵan deıin de kórsetilgen.
«Keıingi eki kúnde maǵan qaraı ekpindi aqparattyq jáne psıhologıalyq shabýyl bastaldy. Ony ózim de kútkenmin. Sebebi, oǵan etim úırengen. Mundaı shabýyldar maǵan 2008, 2011, 2019-ynshy jyldary da jasalǵan. Jasyrmaımyn ońaı emes. Biraq shydaýǵa týra keledi. Endi sizderge bul tehnologıa qalaı jasaqtalatynyn túsindirýge tyrysaıyn. Mysaly osy jolǵy shabýyldyń taqyryby meniń namaz oqyp júrip alaıaqtyq jasaıtyn adamdar jaıly aıtqan sózimdi alǵa tartyp, sol arqyly qoǵamdy maǵan qarsy qoımaq. Maqsaty belgili. Birinshisi- meni qorqytý, ekinshisi-meniń jeke basyma qastandyq jasalsa, osy sebepten eken degizý. Sóz joq aqyldy júris. Ekeýiniń bireýine jetkenshe olardyń toqtamaıtynyn da bilemin. Táýekel. Mańdaıǵa jazǵanyn kóremiz... bárine birdeı bir ǵana jaýabym bar.
Qadirli aǵaıyn, men de ózderińiz sıaqty kóp pendeniń birimin. Eshkimnen tyǵylyp, eshkimnen qashyp júrgen joqpyn. Qandaı da bir aıtarlaryńyz bolsa, jaýabyn berýge daıynmyn. Bar armanym elimniń durys ómir súrgenin, otanymnyń gúldengenin kórý ǵana. Eshbir toptyń aldynda tizerlep keshirim suramaımyn! Óıtkeni oǵan sebep kórip turǵan joqpyn. Áleýmettik jeli shýlady eken dep, dirildeıtin qorqaqtaryń men emes. Alǵa qoıǵan naqty maqsatymmen josparym bar. Sol jumystardy bitirýim kerek. Májilis minberinen halyqqa bergen antym bar. Berilgen merzim bes jyl. Sol bes jylymdy halyqtyń múddesin qorǵaýǵa arnaımyn. Basqasy bir jaratqannyń quzyrynda.
Túsinetin shyǵarsyzdar dep oılaımyn.
P.S
Vatsabyma shyǵyp, qorqytpaqshy bolyp jatqan batyrsymaqtar.
Senderden shoshyp júretin jaǵdaıym joq. Aptasyna bes kún jumysqa jaıaý baryp, jaıaý kelemin. Qylatyndaryńdy qylyp alyńdar. Oqqaǵarym da, sender aıtqan «bratvam» da joq. Sengenim bir Qudaı», - dedi depýtat jazbasynda.