Keıbir jolda kólik qozǵalysyna shekteý qoıyldy.
Tórt oblysta respýblıkalyq mańyzy bar bes joldy qyzylsý basyp jatyr, dep habarlaıdy Almaty-akshamy.kz Qazavtojol mekemesine silteme jasap.
Mamandardyń aıtýynsha, Abaı, Aqtóbe, Qostanaı jáne Ulytaý oblystaryndaǵy joldarda jaǵdaı kúrdeli. Jalpy respýblıkadaǵy joldardyń basym kópshiligin erigen qar sýy alyp jatyr.
"Abaı oblysyndaǵy "Qaraǵandy – Aıagóz – Tarbaǵataı - Boǵaz" avtojolynyń 707-941 shaqyrymynda jeńil avtomobılder úshin shekteý qoıyldy. Joldyń 878 jáne 923 km-de dıametri 1 metr bolatyn bir núkteli qubyr jáne eki aralyqty kópir bar. Jol tósemin saqtap qalý úshin jol jıekteri nyǵaıtylyp, jasandy bilikter jasalyp jatyr", - deıdi Qazavtojol mamandary.
Aqtóbe oblysynda "Qandyaǵash – Embi - Shalqar - Yrǵyz" avtojolynyń 288 shaqyrymynda da osyndaı jaǵdaı.
"Joldyń osy ýchaskesinde dıametri 1,5 m bolatyn bir núkteli sý ótkizgish qubyr bar, odan ári sý aǵynyn boldyrmaý úshin 650 qap qum tóseldi. Sonymen qatar qosymsha 480 tonna qum jetkizildi. Tolyp ketý saldaryn joıý úshin jol jumysshylary jumyldyryldy", - deıdi vedomstvodaǵylar.
Bul jolmen júrýge kóliktiń barlyq túrine shekteý qoıyldy.
Osy oblystaǵy "Samara-SHymkent" avtojolyn da qyzyl sý basyp jatyr. Bul jolda jeńil avtomobılder úshin qozǵalys ýaqytsha toqtatyldy.
Sondaı-aq Qostanaı oblysy "Jezqazǵan-Petropavl" avtojoly 269 km-i erigen qar sýynyń astynda qaldy.
"Bul aýmaqqa da qubyrlar qoıyldy. Joldaǵy ýaqytsha ózgeristerdi belgileý úshin ýaqytsha jol belgileri men sıgnaldyq baǵandar ornatyldy. Jol tósemin oqshaýlaý úshin kólemi 150 tekshe metr ınertti materıal aǵash, qoqys tas daıyndaldy. 3 birlik tehnıka jáne 9 adam jumyldyryldy", - deıdi jol mamandary.
Ulytaý oblysynda da dál osyndaı jaǵdaı. "Aqshataý – Ortaý - Bıdaıyq" avtojolyn sý basyp jatyr. Dál qazirgi ýaqytta respýblıkalyq mańyzy bar qaýipsizdikti qamtamasyz etý úshin jalpy sany 610 birlik tehnıka jáne 1558 adam jumyldyryldy.