QR Premer-Mınıstriniń orynbasary Tamara Dúısenova 2024 jylǵy jazǵy Olımpıada oıyndaryna daıyndyq jumystarynyń barysymen tanysty, dep habarlaıdy almaty-akshamy.kz
Týrızm jáne sport vıse-mınıstri Serik Jaraspaev pen Ulttyq olımpıada komıteti Sport departamentiniń dırektory Elsıar Qanaǵatov atqarylyp jatqan sharalar týraly baıandady.
Parıjde ótetin dúbirli dodaǵa daıyndyq jumystaryn úılestirý úshin jedel shtab qurylǵan. Onyń quramyna múddeli memlekettik organdar, Ulttyq olımpıada jáne Paralımpıada komıtetteri, sport federasıalary men Fransıa elshiliginiń ókilderi kiredi.
Týrızm jáne sport vıse-mınıstri Serik Jaraspaevtyń sózinshe, ázirge qorjynymyzda 11 sport túrinen 31 lısenzıa bar. Aldaǵy ýaqytta sportshylarymyz lısenzıa beriletin 40-tan asa álemdik, qurlyqtyq, reıtıńtik týrnırlerde baq synasatyn bolady. Osyǵan baılanysty lısenzıalar sany artady dep kútilýde.
«Sport túriniń ózindik erekshelikterin, árbir sportshynyń fızıologıasy men qajettilikterin eskere otyryp, jekeleı daıyndyq josparlary bekitildi. Federasıalardyń ótinishteri boıynsha ulttyq quramalarǵa kerekti farmokologıalyq zattar men sporttyq taǵamdar satyp alynady. Sportshylar men jattyqtyrýshylardy materıaldyq jaǵynan qamtamasyz etý jumystary jan-jaqty qolǵa alynyp otyr», — dedi Serik Jaraspaev.
Tamara Dúısenova sportshylarǵa zor úmit artylyp otyrǵanyn tilge tıek etti. Osy tusta vıse-premer dodada baq synaıtyndardyń sapaly daıyndyǵy úshin barlyq qajetti zattarmen qamtamasyz etý máselelerine basa mán berdi.
«Elimizde myqty sport mektepteri bar. Ásirese boks, kúres, jeńil atletıka sekildi túrlerinen baq synaıtyndardan jurt júlde kútedi. Lısenzıaǵa qol jetkizgen, odan úmittilermen tıisti deńgeıde jumys júrgizilýi kerek. Sondaı-aq qarjylyq mindettemelerdiń ýaqytynda oryndalýyn muqıat qadaǵalaý mańyzdy», — dep atap ótti vıse-premer.
Tamara Dúısenova olımpıadalyq rezerv daıyndaý isimen turaqty aınalysý qajettigin erekshe atap ótti. Bul rette sport mektepteri men salalyq federasıalar jumysyn jetildirý joldaryn qarastyrý tapsyryldy.