Erteń, 25 qazanda qazaqstandyqtar alǵash ret Respýblıka kúnin ulttyq mereke retinde atap ótedi. Osyǵan baılanysty barlyq óńirlerde túrli mádenı is-sharalar uıymdastyryldy. Sondaı-aq, birqatar áleýmettik jáne ónerkásiptik nysandardy iske qosý josparlanyp otyr. Bul týraly Almaty-akshamy.kz Inform.kz-ke silteme jasap habarlaıdy.
Túrkistan oblysynda merekege oraı birqatar bilim berý nysany – Qazyǵurt aýylynda 150 oqýshyǵa arnalǵan jekemenshik mektep, Saryaǵash qalasynda 900 oqýshyǵa arnalǵan mektep, Aqsýkent aýylynda 1 200 balaǵa arnalǵan jekemenshik mektep, Qarabulaq aýylynda 400 balaǵa arnalǵan jalpy bilim beretin mektep, Túrkistanda 500 oryndyq daryndy balalarǵa arnalǵan mektep jáne 200 balaǵa arnalǵan mektep-balabaqsha ashylady. Sonymen qatar, óńirde iri maqta óńdeý zaýyty iske qosylady. Táýligine 100 myń kirpish shyǵaratyn jańa zaýyt qoldanysqa berildi. Italıa, Japonıa, Fransıa jáne Reseı óndiretin zamanaýı jabdyqtarmen jasaqtalǵan kásiporyn eldiń basqa aımaqtaryn da sapaly kirpishpen qamtamasyz ete alady.
Soltústik Qazaqstan oblysynda jylyna 5 000 tonna qaǵaz ónimderin shyǵaratyn kásiporyn, 1,5 myń tonna qus etin óndiretin fabrıka, 3,5 tonna sút óndiretin taýarly-sút fermasy iske qosyldy.
Jambyl oblysynda jylyna 500 myń tonna amofos óndiretin «Qazfosfat» JSHS jańa mıneral tyńaıtqyshtar sehy ashyldy. Osy jobany iske asyrý arqasynda aldaǵy jyly qazaqstandyq agrarıılerdiń amofosqa degen suranysyn tolyq qanaǵattandyrý josparlanyp otyr.
Pavlodar oblysynda merekege oraı Ekibastuzda ornalasqan 108 páterden turatyn toǵyz qabatty turǵyn úı paıdalanýǵa berildi, 260 balaǵa arnalǵan bóbekjaı-baqsha ashyldy.
Qaraǵandyda 600 oryndyq aýtızmi bar balalardy qoldaý ortalyǵyn iske qosý josparlanyp otyr, onda ár balaǵa jeke túzetý baǵdarlamasy ázirlenetin bolady.
Temirtaýda zamanaýı jabdyqtarmen jabdyqtalǵan jańa emhana men mádenı-saýyqtyrý kesheni ashyldy. Sonymen qatar, qalada kóp páterli turǵyn úı salyndy, kezekte turǵan 90 azamat kiltterin aldy.
Qaraǵandy oblysynyń Doskeı aýylynda mádenıet jáne óner uıymdarynyń atynan kezekte turǵandar úshin kóp páterli turǵyn úı jóndeldi.
Aqmola oblysynyń Qoıandy aýylynda bir aýysymda 200 adam qabyldaıtyn jańa Otbasylyq densaýlyq ortalyǵy ashyldy, ol halyqqa sapaly medısınalyq qyzmet kórsetýge baǵyttalǵan. Sonymen qatar, Balkashıno aýylynda «Aýyl – el besigi» jobasy aıasynda «Ýrojaı» stadıony paıdalanýǵa berildi, ol kásibı mamandar úshin de, bos ýaqytty tıimdi ótkizgisi keletin qarapaıym turǵyndar úshin de paıdaly ortalyq bolmaq.
Mańǵystaý oblysynda shyny-plastık buıymdar, jelim jáne qymtaq óndiretin zaýyt iske qosylady, onyń ónimderi 100% elimizde óndirilmek.
Qyzylorda oblysynda bir ýaqytta 80 balalar sport-oıyn alańy, oqýshylar saraıy, óner mektebi, balabaqsha jáne dárigerlik ambýlatorıa ashyldy.
Qostanaı oblysynda Otbasyn qoldaý ortalyǵy jumysyn bastady, onda qıyn jaǵdaıǵa tap bolǵan adamdarǵa psıhologıalyq jáne quqyqtyq turǵydan kómek kórsetiledi. Sonymen qatar, tabıǵı órtten zardap shekkenderge arnalǵan 91 turǵyn úıdiń qurylysy aıaqtaldy.
Abaı oblysynyń Stepnoı kentinde barlyq zamanaýı talaptarǵa saı keletin 300 oqýshyǵa arnalǵan jańa oqý orny ashyldy.
Sonymen qatar, óńirlerde birqatar ákimshilik, óndiris, turǵyn úı, medısına, aýyl sharýashylyǵy, sport jáne mádenı oıyn-saýyq nysandary paıdalanýǵa beriledi degen jospar bar.
Respýblıka kúni naǵyz halyqtyń merekesine aınalady. 25 qazanda elimizdiń iri telearnalarynda merekelik baǵdarlamalar, fılmder men konsertter kórsetiledi. Óńirlerde túrli festıválder, kórmeler, ǵylymı-tájirıbelik konferensıalar, sondaı-aq ekologıalyq jáne qaıyrymdylyq aksıalary ótedi. «Jas óren», URKER jáne t.b. respýblıkalyq baıqaýlardyń qorytyndysy shyǵarylady. Astanada, Almatyda jáne respýblıkanyń basqa qalalarynda merekelik konsertter ótedi.