Tumaý juqtyrǵandar sany qarashada nemese jeltoqsanda artady
AQSH-tyń balalar aýrýhanasynda aýamen juǵatyn aýrýǵa shaldyqqan kishkentaı naýqastar sany kúrt ósken, dep habarlaıdy Almaty-akshamy.kz Inform.kz-ke silteme jasap.
ABC news telearnasy AQSH-taǵy aýrýhanalarda pedıator bólimderi sońǵy eki jylda eń joǵary deńgeıde tolyp qalǵan. AQSH Densaýlyq saqtaý jáne halyqqa qyzmet kórsetý departamentiniń málimeti boıynsha, búkil elde aýrýhanalar respıratorlyq aýrýlary bar kishkentaı naýqastarǵa toly, olar qazirgi ýaqytta shamamen 40 myń aýrýhana tóseginiń 71%-yn quraıdy.
Rod-Aılend shtatyndaǵy Hasbro aýrýhanasynyń balalar juqpaly aýrýlary bóliminiń meńgerýshisi, doktor Maıkl Koster qyrkúıektiń ortasynan qazan aıynyń ortasyna deıin JRVI asqynyp, aýrýhanaǵa túsken jas pasıentterdiń sany eki ese óskenin aıtty.
«Biz 100 mılden astam qashyqtyqta ornalasqan aýdandardan kelgen pasıentterdi qabyldaımyz, óıtkeni olardyń jergilikti balalar aýrýhanasy tolyp nemese jabylyp qalǵan», - dedi M.Koster ABC News-ke.
Jergilikti sarapshylardyń paıymdaýynsha, tumaýdyń asqynýy ishinara COVID-19 shekteýlerin jeńildetkennen týyndaýy múmkin.
«Bizde koronavırýs pandemıasymen kúresýdegi barlyq kúsh-jigerdiń nátıjesinde tynysh ýaqyt bolǵan. Iaǵnı, buryn jyl saıyn ótkerip júrgen keıbir vırýstar «oralyp», qazir odan saıyn kúsheıgenin kórip otyrmyz», - dedi Boston balalar aýrýhanasynyń medısınalyq qyzmetkeri Djon Braýnshteın.
CDC málimetteri boıynsha, ótken aptada ǵana 1674 naýqas tumaýdyń asqynýymen aýrýhanaǵa jatqyzyldy.
«Ádette tumaý juqtyrǵandar sany qarashada nemese jeltoqsanda artyp, aqpanda eń joǵary deńgeıge jetedi. Biraq, bıyl qazanda tumaý órship ketti», - dedi maman.