1990 jyly 25 qazanda Qazaq SSR-niń Memlekettik egemendigi týraly deklarasıa qabyldandy.
Parlament Senatynyń depýtaty Murat Baqtıaruly 25 qazan elimizdegi eń ulyq meıramdardyń biri bolýǵa ábden laıyqty ekendigin aıtty, dep habarlaıdy Almaty-akshamy.kz Elorda.info saıtyna silteme jasap.
«1990 jyly 25 qazan kúni Qazaq KSR Joǵarǵy Keńesiniń sheshimimen Qazaq SSR-niń memlekettik egemendigi týraly deklarasıa qabyldandy. Osydan bastap bizdiń Otanymyz – Qazaqstan eńsesi bıik, terezesi teń derbes memleket retinde álem kartasynan oıyp oryn aldy. Osy turǵydan alǵanda, 25 qazan elimizdegi eń ulyq meıramdardyń biri bolýǵa ábden laıyq.
Elimizde bul kún 2009 jylǵa deıin ulttyq mereke retinde toılanyp keldi. 2009 jyly «Qazaqstan Respýblıkasyndaǵy merekeler týraly» qoldanystaǵy zańǵa ózgerister engizildi. Oǵan sáıkes, 30 tamyz – Qazaqstan Respýblıkasynyń Konstıtýsıasy kúni ulttyq mereke bolyp ózgertilýine baılanysty, 25 qazan – Respýblıka kúni memlekettik merekeler tiziminen alynyp tastaldy. Shyn máninde, bizdiń eldiń óz egemendigin jarıalaǵan bas meıramy bolýy kerek edi. Al ony 16 jeltoqsanmen qabattastyrý tym yńǵaısyz.
1986 jyly 16, 17, 18 jeltoqsan kúnderi Almaty qalasynda qazaq ultynyń qany tógildi. 2011 jyly 16 jeltoqsanda da Jańaózen qalasynda taǵy qan aqty. Endeshe memleket qurylǵan kúndi osyndaı tragedıasy bar kúnde toılaý moraldyq turǵydan durys emes. Sondyqtan Qazaqstan Prezıdenti Qasym-Jomart Toqaevtyń ulttyq mereke mártebesin Respýblıka kúnine qaıtarýdy usynýy óte oryndy sheshim boldy. Biz 16 jeltoqsandy Táýelsizdik merekesi dep toılaǵanymyzben, 1990 jyly 25 qazan kúni Qazaq SSR-niń memlekettik egemendigi týraly deklarasıa jarıalanǵan sátten bastap Qazaqstan tórtkúl dúnıege derbes memleket retinde tanylǵan. Bul – tarıhı shyndyq. Mine, bıyldan bastap osy bir ulyq kún óz mártebesin aldy. Mereke qutty bolsyn, otandastar»! – dedi senator.