Qazaqstanda jatyr moıny obyrynyń negizgi qozdyrǵyshy adam papıllomasy vırýsyna (APV) qarsy qyzdardy vaksınasıalaý bastaldy.
Búgingi kúni respýblıka boıynsha 11-13 jas aralyǵyndaǵy 1,6 myńǵa jýyq qyz APV-ǵa qarsy egildi. Egilgen jaǵdaılardyń arasynda ımmýndaýdan keıin qolaısyz kórinister tirkelgen joq, dep habarlaıdy aqshamnews.kz
Qazaqstan Respýblıkasynyń Ulttyq vaksınasıa kúntizbesine sáıkes Dúnıejúzilik densaýlyq saqtaý uıymynyń usynymyn jáne halyqty ımmýndaý jónindegi sarapshylardyń Ulttyq tehnıkalyq konsýltatıvtik tobynyń sheshimin eskere otyryp, 11 jastaǵy qyzdar josparly vaksınasıalaýǵa jatady.
Budan basqa, 11 jastan asqan qyzdardyń ata-analarynyń ótinishterin eskere otyryp, 12-13 jas aralyǵyndaǵy qyzdardy APV-ge qarsy tolyqtyra ımmýndaý júrgizýdi týraly sheshim qabyldandy.
Ulttyq vaksınasıa kúntizbesine sáıkes jáne óndirýshiniń nusqaýlyqtaryna sáıkes, APV-den qorǵaý úshin 6 aı aralyqpen vaksınanyń eki dozasyn alý qajet.
Búgingi kúni APV-ǵa qarsy vaksınasıa elimizdiń 9 óńirinde – Qaraǵandy, Shyǵys Qazaqstan, Batys Qazaqstan, Pavlodar, Jetisý, Túrkistan, Ulytaý, Aqmola oblystarynda jáne Astana qalasynda júrgizilýde.
Aýdandar, medısınalyq uıymdar boıynsha vaksınany jetkizý jáne taratý merzimderin eskere otyryp, 6 óńirde (Abaı, Aqtóbe, Almaty, Atyraý, Qostanaı jáne Soltústik Qazaqstan oblystary) APV-ǵa qarsy aǵymdaǵy vaksınasıa bastaldy. Qalǵan 5 óńirde vaksınasıany kelesi aptada bastaý josparlanyp otyr.
Qazirgi ýaqytta elge vaksınanyń birinshi partıasy 173,7 myń doza kóleminde jetkizildi.
Aǵymdaǵy jyldyń qarasha aıynda 175,8 myń doza kóleminde vaksınanyń ekinshi partıasy túsedi dep josparlanyp otyr.
Vaksınasıa negizinen mektep oqýshylaryn vaksınasıalaýdyń basqa túrleri júrgiziletin mektepterdiń medısınalyq kabınetterinde júrgiziledi.
APV-ǵa qarsy vaksınasıany qosa alǵanda kez kelgen vaksınasıa kámeletke tolmaǵan balanyń ata-anasynyń nemese onyń qamqorshysynyń aqparattandyrylǵan kelisimin alǵannan keıin ǵana júrgiziletinin atap aıtý qajet.
Búgingi kúni papılloma vırýsyn juqtyrýdyń jáne jatyr moıny obyrynyń damýynyń aldyn alýdyń jalǵyz ádisi vaksınasıa bolyp tabylatynyn eske salamyz.
Jyl saıyn Qazaqstanda jatyr moıny obyrynyń 1900-ge jýyq jańa jaǵdaıy tirkeledi, orta eseppen 600-den astam áıel osy patologıadan qaıtys bolady.