Almaty ákimi Erbolat Dosaev Bostandyq aýdany turǵyndarymen kezdesý barysynda qalada qoǵamdyq keńistikterdi kórkeıtý jáne jaıly qalalyq orta qurý jumystary júıeli túrde jalǵasatynyn aıtty, dep habarlaıdy aqshamnews.kz
2024 jyly úsh serýen aımaǵyn kórkeıtý jumystary aıaqtaldy: Abaı dańǵylynyń Turǵyt Ozal kóshesinen Baızaqov kóshesine deıingi bóligi, Jeltoqsan kóshesiniń Abaı dańǵyly men Sátbaev kóshesi arasyndaǵy ýchaskesi jáne Abaı men Gagarın dańǵyldarynyń qıylysyndaǵy skver.
Bul jobalar aıasynda jańa balalar jáne sport alańdary, kóshe jıhazdary, demalys oryndary ornatylyp, jaryqtandyrý júıesi jańǵyrtyldy, sondaı-aq jasyl jelek otyrǵyzyldy.
Sonymen qatar, 2024 jyldyń jeltoqsanynda Gagarın dańǵyly boıyndaǵy býlvardaǵy qurylys jumystary aıaqtaldy, al bıyl sáýir aıynda onyń kógaldandyrý jumystary aıaqtalady.
«Byltyr qazan aıynda Úlken Almaty ózeniniń jaǵalaýyn sý bólgishten Abaı dańǵylyna deıingi 5,7 shaqyrymdyq aýmaqta rekonstrýksıalaý jumystary bastaldy. Joba aıasynda beton tireýish qurylymdaryn tolyq jańartý, jaıaý júrginshiler kópirlerin, balalar jáne sport alańdaryn, kóshe jıhazdaryn ornatý jáne velojolaqtar salý qarastyrylǵan. Bul jumystardy 2026 jyldyń sáýir aıynda aıaqtaýdy josparlap otyrmyz», – dedi Erbolat Dosaev.
Sonymen qatar, onyń aıtýynsha, bıyl mamyr aıynda taǵy úsh qoǵamdyq keńistikti kórkeıtý boıynsha aýqymdy jumys bastalady. «Atakent» QİYO aýmaǵyn rekonstrýksıalaý (asfált jabyndysy men tas tósenishterdi aýystyrý, avtomatty sýarý júıesin ornatý, jaryqtandyrý men kóshe jıhazdaryn jańartý), «Ońtústik» saıabaǵynyń soltústigindegi jasyl aımaqty kórkeıtý (jaıaý júrginshiler jolyn tóseý, kógaldandyrý, jaryqtandyrý jáne kóshe jıhazdaryn ornatý), Nur-Alataý shaǵyn aýdanyndaǵy skverdi kórkeıtý.
Sondaı-aq, mamyr aıynda Respýblıka alańyndaǵy sýburqaq keshenderine kúrdeli jóndeý jumystary bastalyp, olardy 2025 jyldyń qazan aıynda aıaqtaý josparlanyp otyr.